Listahanan Hotline Gimuntar

Ni Alex Mapoy

BUTUAN CITY – Gimuntar na sa Department of Social Welfare and Development (DSWD) Caraga ang hotline subay sa pormal nga pagsugod ning adlawa, Lunes sa Listahanan o mas naila nga National Household Targeting System for Poverty Reduction (NHTS-PR).

Katuyuan niini nga direktang mapaabot sa hingtungdang indibidwal ang reklamo o kaha kalibog kabahin sa nasangpit nga assessment nga gihimo sa mga hired field workers sa ahensya.

Sayod ang liderato ni DSWD Caraga Regional Director Minda B. Brigoli nga dunay pipila ka mga tawo ang matingala kon nganong kini suble nga gi-survey hinungdan nga nagmuntar kining daan og hotline.

Sumala ni Maria Cecilia N. Sosas sa Social Marketing Unit sa DSWD Caraga, mahimong ipaabot ang mga kalibog o kaha reklamo sa 0921-774-1896.

Dugang ni Sosas, sa matag pangutana o reklamo, awtomatiko kining tubagon sa gitahasan nga opisyal sa ahensya pinaagi ni Listahanan Regional Field Coordinator Aldie Mae A. Andoy.

Simple lamang matod pa ang pagpadangat sa mga reklamo o pangutana ngadto kang Andoy pinaagi sa pag-key in sa cellphone Listahanan <space> name <space> location <space>  reklamo ug i-send sa 0921-774-1896.

Ang gimuntar nga hotline magsilbing instrumento aron direktang mapaabot sa nagpakabanang indibidwal ang mga kalibog, pangutana, o reklamo kabahin sa pagsugod sa ikaduhang hugna sa Listahanan Project sa ahensya.

Dumduman nga una nang nakigtagbo ang kadumalahan ni Brigoli ngadto sa tanang Sangguniang Bayan Members (SB), Municipal Social Welfare Development Officers (MSWDOs), Municipal Planning Development Officers (MPDOs), Barangay Officials, ug Civil Society Organizations (CSOs) sa tibuok rehiyon aron ipadangat ang nasangpit nga proyekto.

Niani usab kini sa sento porsyento nga suporta gikan sa mga nahisgutan alang sa kalamposan sa proyekto ug usab, matabangan ang mga ahensya nga makakuha sa kredibleng datos gikan sa i-assess nga mga pamilya.