P48-M Damyos sa El Niño?

Ni Alex Mapoy

Gipasabot ni DA Caraga Information Section Chief Emmylou T.
Presilda  ang hinungdan nganong dili pa makahatag sa actual 
damage sa El Niño ang buhatan. Photo by Alex Mapoy

BUTUAN CITY – Nilansang na sa kapin P48 milyones ang damyos sa weak El Niño sa Agusan del Norte

Ang maong kantidad, nagsilbing initial estimate sa buhatan sa Department of Agriculture (DA) Caraga basi sa nangabot nga datos sa nahimong damyos gikan sa pipila ka lungsod sa probensya.

Sumala ni DA Caraga Information Section Chief Emmylou T. Presilda, ang kapin P48 milyones nga estimated damage, dili pa maseguro kon mao gyod kini ang klarong damyos sanglit ang nadawat nga report gikan sa pipila ka mga Local Government Units (LGUs) ang ipailawom pa sa makuti nga pagsusi.

Katarungan ni Presilda, maglisod ang rehiyonal nga buhatan paghatag sa kinatibuk-ang kantidad nga damyos sa El Niño ning rehiyon labi na sa agrikultura sanglit dugay kaayo nanghatag og report ang kada munisipyo.

Pamugos sa opisyal, kon sumadahon ang ihap sa kalungsoran sa Agusan del Norte kansa maoy gikonsidera nga gi-igo sa huwaw, pipila pa lamang ka lungsod ang nagpaabot og report.

Bisan pa man, naningkamot ang buhatan nga sa labing dali nga panahon, makapagawas og consolidated report kabahin sa damyos sa agrikultura bunga sa epekto sa weak El Niño.

Bugtong ang Agusan del Norte lamang ang gikonsidera nga na apektohan pag-ayo sa huwaw diin sa bersyon sa Philippine Atmospheric, Geophysical and Astronomical Services Administration (PAGASA), ang probensya nakasinati sa “drought” samtang ang pipila ka bahin sa rehiyon ang nakasinati og “dry spell.”

Luyo pa man sa nasangpit nga kahimtang sa panahon, gipasalig sa ahensya nga masinatian man ang El Niño o dili, nakahikyad nang daan ang “mitigating measure” sa buhatan.

Una nang gikabutyag sa opisyal nga ning tuig 2015, dunay P75 milyones nga pundo ang gigahin sa rehiyonal nga buhatan isip maoy gamiton alang sa pagahimuon nga interbensyon batok El Niño Phenomenon.