Zero Illegal Logging Gitinguha

Ni Alex Mapoy 

Ang maong hulagway ang gustong wad-on sa DENR Caraga aron dili mahiabot ang katawhan
sa panimalos sa kinaiyahan.

BUTUAN CITY – Kampante ang liderato sa Department of Environment and Natural Resources Region (DENR) Caraga nga mawagtang sa hingpit ang illegal logging activity sulod niining rehiyon.

Nasayran nga target sa liderato ni DENR Caraga Regional Director Nonito M. Tamayo nga pag-abot sa Hunyo 30 ning tuiga, mahunong na ang iligal nga pagpamutol sa kahoy.

Ang nahisgutang tinguha ang hugot nga gisuportahan sa mga senior staff sa rehiyonal nga buhatan lakip na ang mga tag-as nga opisyal sa PENR ug CENR nga buhatan ilawom sa maong ahensya.

Atol sa duha ka adlaw nga panagtagbo sa mga nahisgutan diha sa Samping Conference Hall nga nahimutang sa dalang J.C Aquino ning siyudad, nagkauyon ang tanang nitambong nga mga opisyal nga pakusgan ang kampanya batok illegal logging.

Nasuta nga nigasto na og dako ang ahensya aron lamang mapahunong ang maong kalihokan labi na sa mga dapit diin notado nga kusog ang kalihokang iligal sama sa pipila ka lugar sa Agusan del Sur ug Surigao del Sur.

Hisayran nga sa 31 ka mga illegal logging hotspots sa nasod, ang 17 niini, ania sa rehiyon sa Caraga ug sa maong ihap, 6 na niini ang hingpit nga na “neutralized.”

Dunay gikataho nga matod pa, mga timber poachers ug smugglers kinsa pabilin nga dili mapakgang, apan dihang hingpit nga gipatuman ang Executive Order (EO) 23, nihinay ang kalihokan sa nasangpit nga grupo.

Ang EO 23, kahinumdoman gipagawas ni Pangulong Noynoy Aquino adtong Pebrero 1, 2011 diin nakalatid niini ang deklarasyon sa “Logging Moratorium in Natural and Residual Forest” sulod sa 25 ka tuig sa tibuok nasod.

Gihimo kini human nasuta nga usa ang illegal logging activity sa nasod ang hinungdan kon nganong nahimo nga abnormal ang dagan sa panahon diin halos matag tuig, kanunay maigo ang nasod sa kalamidad.