Dokumento sa LGU Gi-Ebalwit

Ni Alex Mapoy

AGUSAN DEL NORTE – Gipailawom na sa makuti nga ebalwasyon ang tanang dokumento nga gisumite sa tanang kagamhanang lokal sa probensya alang sa gipahigayon nga Search for 2015 Disaster-Resilient LGU o naila nga Gawad Kalasag 2015.

Ang madeklara nga mananaug makadawat sa liboan ka pesos nga ganti kansang premyo gamiton sa pagpabarug sa nagkadaiyang proyekto, plano, programa, o kalihokan nga naglambigit sa pagpangandam sa bisan unsa nga kalamidad.

Kini nga kalihokan nagsilbing tinuig nga gihimo diin niining tuiga, mao ang ikaduha nga hugna sa pagpahigayon sa Gawad Kalasag.

Kadtong lokal nga kagamhanan nga maoy madeklarang mananaug, hatagan kini og pasidungog karong Oktobre ning tuiga atol sa himuong ANGELL Awarding.

Sakop sa Provincial Selection Committee (PSC), ang Department of Interior and Local Government (DILG) kansa maoy nagsilbing nangulo sa komitiba.

Nahimong membro sa PSC ang Sangguniang Panlalawigan Office (SPO), Provincial Social Welfare Population and Nutrition Services Office (PSWPNSO), Provincial Health Office (PHO), Philippine Information Agency (PIA), Department of Education (DepEd). Department of Science and Technology (DOST), ug Red Cross.

Basi sa impormasyon ni Aimee B. Sienes nga gipaabot ngadto sa buhatan ni Community Affairs Officer (CAO) IV Edgar M. Palarca, Jr. tanang dokumento nga gisumite sa tanang Local Government Units (LGUs) ang padayon kining gi-ebalwit.