Tuesday, May 12, 2015

Pagkunhod sa Tubig Bisan Giulan Gipasabot

BUTUAN CITY – Dili bastante ang tubig ulan nga nibisibis sa watershed hinungdan nga bisan padayon kining gi-ulan, padayon usab nga nagkaubos ang lebel sa tubig.

Pagklaro kini sa buhatan sa Philippine Atmospheric, Geophysical and Astronomical Services Administration (PAGASA) pinaagi ni Pagasa Caraga Lolita L. Vinalay atubangan sa mga tigbalita.

Sumala ni Vinalay, isolated rain lang ang nasinati sa watershed area sa dakbayan sa Butuan partikular na sa Sitio Iyao, Brgy. Anticala ug ang tubig ulan nga nitagas sa maong dapit ang dili pa igo ihulip sa volume sa tubig nga nawala bunga sa epekto sa weak El Niño sa Agusan del Norte.

Dugang ni Vinalay, ang padayong pag-ubos sa lebel sa tubig sa watershed magpadayon ug mabalik lamang kini kon mobalik sa normal ang kahimtang sa panahon.

Hisayran nga sa facebook account sa Butuan City Water District (BCWD), isa sa mga netizens nipadayag sa kaugalingong kasuko batok sa water district diin sa tonada sa inistoryahan, wala kini nituo nga apektado sa El Niño ang watershed tungod sa gipagawas usab sa water district nga mga press releases nga gibundakan sa makusog nga ulan ang nasangpit nga dapit ug nitambag pa kini sa mga konsumante nga magtigom og daghang tubig.

Bisan pa man sa maong komento, gidawat kini sa kadumalahan sa water district isip pagtahod sa gawasnong pagpadayag sa matag indibidwal.

Dumduman nga una nang nagpagawas ang Pagasa og forecast nga ang nasinatiang huwaw, hangtod pa kini sa tunga-tungang bahin ning tuiga ug dunay tsansa nga molahos pa kini sa kataposang bahin ning tuiga.  

No comments:

Post a Comment