Employer Palpak Lutoson

Ni Alex Mapoy

To see the whole text, just click here.

BUTUAN CITY – Nimando na ang liderato sa Philippine Health Insurance Corporation (PhilHealth) nga lutoson ang mga employer nga wala nihimo sa ilang obligasyon pag-remit sa nakolektang kontribusyon ngadto sa pinakaduol nga buhatan sa health insurance gikan sa mismong empleyado.

Gipagawas ang nasangpit nga kamanduan human nakadawat og daghang reklamo ang ahensya nga daghang employer sa tibuok nasod ang abtik mo deduct sa sweldo sa ilang mga trabahante alang sa kontribusyon sa PhilHealth, apan, wala kini gi-remit ug kon gi-remit man, dili na mao ang kantidad o kaha, wala gi-remit sa hustong petsa nga gitakda alang sa remittance.

Subay niini, daghang empleyado nga membro sa PhilHealth ang wala nakapahimulos sa mga benepisyo nga angay unta matilawan sa isa ka lehitimo nga membro tungod sa pagpasagad sa pipila ka mga employer.

Basi sa impormasyon nga gipaabot ni Kenneth Po sa PhilHealth Caraga, dili gusto ni PhilHealth President and CEO Alexander A. Padilla nga dunay mga membro o kaha dependents sa membro ang dili makapahimulos sa benepisyo panahon sa panginahanglan gumikan lamang sa pagpasagad o pagkabadlungon sa hingtungdang employer.

Dugang ni Po, tinguha ni Padilla nga dili na kini masinatian pa sa kapin 13 milyones ka mga empleyado sa tibuok Pilipinas hinungdan nga hugot niining gimanduan ang tanang employer nga himuon ang ilang obligasyon labi na ang anaa sa pribadong sektor.

Gitin-aw ni Padilla, ang kapakyas sa mga employer pag-remit sa gikinahanglang kontribusyon ug pag-sumite sa “remittance reports,” kinahanglan nga manubag ang hingtungdang employer ug hugot kining gimanduan sa pag-reimburse sa kantidad nga angayang i-remit sa higayong mo duso og pormal nga reklamo ang mga empleyado niini.

Ang maong kamanduan dili lamang hinimo-himo sa opisyal kondi, nagbasi kini sa nakalatid sa Section 18(d) sa Revised Implementing Rules and Regulations of the National Health Insurance Act of 2013.

Nakalatid sa PhilHealth Circular No. 003, s-2015, kuhaon gikan sa employer ang kinatibuk-ang kantidad sa claim payments sa oras masuta nga wala kini gi-remit sa pinakaduol nga buhatan sa PhilHealth.

Kadtong mapasagaron nga employer pahamtangan og multa nga dili mo ubos sa P5,000 ug piluon kini kon pila ang tinuod nga kinatibuk-ang ihap sa mga empleyado (P5,000 x No. of Employees).

Ang nahisgutang multa ipahamtang niadtong employer nga masuta nga napakyas o naglikay pagpa-membro sa mga empleyado ngadto sa PhilHealth, o kaha, wala gikaltasan og kontribusyon ang membro aron dili kini makahatag sa counterpart.

Sa samang paagi, dili mo ubos sa P5,000 apan dili usab molapas sa P10,000  “multiplied” sa kinatibuk-ang ihap sa mga empleyado ang pagabayran nga multa sa employer kon kini magdumili o mapakyas pag-remit ug pag-report sa kontribusyon.