Monday, May 25, 2015

Magtutudlo sa SurNor Gibansay

Ma. Hydee E. Relliquete (2nd from left), OIC of SNCAT poses with officials of TESDA during the 1st Harvest Festival last year. TESDA-Caraga Photo File
SURIGAO DEL NORTE – Nahimong hitsas sa kahibalo ang mga magtutudlo sa kalungsoran nga sakop sa probensya sa Surigao del Norte human kini gibansay sa Surigao del Norte College of Agriculture and Technology (SNCAT) sa Brgy. Magpayang lungsod sa Mainit.

Kini nga kalihokan nagsilbing tubag sa kakulang sa mga kwalipikadong magtutudlo sa Department of Education (DepEd) nga maoy mo tudlo sa mga subjects lambigit sa “skills development” alang sa implementasyon sa K to 12 sunod tuig.

Gidumala ang nahisgutang tunghaan sa Technical Education and Skills Development Authority (TESDA).

Ilawom sa Training for Work Scholarship Program (TWSP), nakapahimulos sa libreng pagbansay ang mga magtutudlo gikan sa Surigao del Norte Division.

Gipailawom sa pagbansay ang mga nahisgutan ug gitudloan sa nagkadaiyang katakos sa tumong nga mahimo kining hanas sa nagkadaiyang skills aron mopatigbabaw ang mga Pinoy kon itandi sa silingan nga mga nasod.
Sa Cookery NC II, mokabat sa 39 ka mga magtutudlo ang nisabak niini nga training samtang sa Agricultural Crop Production NC I, 20 ka mga magtutudlo ang naka-avail sa scholarship grant.

Laing 20 ka mga magtutudlo gikan sa DepEd Siargao Island Division ang ni-avail sa libre nga training sa Cookery NC II nga gipahigayon sa lungsod sa Dapa, Siargao Island.

Sa laing bahin, naghanyag usab ang SNCAT sa “free services and assistance” alang sa Sustainable Livelihood Program sa Department of Social Welfare and Development (DSWD)-Caraga.

Apil niini ang regular nga pagpahigayon sa Entrepreneurship Training and Seminar ug Asexual Propagation partikular na sa “grafting and marcoting” nga gihimo sa Matin-ao ug Tolingon, Mainit, Surigao del Norte.

Sa impormasyon nga gipaabot ni TESDA Caraga Specialist 1 Robert Roperos, kabahin sa Community-Based Training Program mao ang paghanyag sa libreng pagbansay ngadto sa Barangay Volunteered Worker sa Barangay San Isidro, Surigao City ingon man paghanyag sa mga “short-term courses” sama sa MicroSoft Word application, MicroSoft Excel application, ug Asexual propagation.

Gipasalig usab matod pa ni Ma. Hydee Relliquete, ang officer-in-charge sa naasoy’ng tunghaan, kon dunay indibidwal o kaha grupo nga mangayo og panabang kanila, andam nila kining hatagan sa libre nga serbisyo sa ngalan sa kinasingkasing nga pagpangalagad ngadto sa mga Caraganons. 

No comments:

Post a Comment