Tuesday, May 26, 2015

DOST Secretary Mahidangat sa Butuan

Ni Alex Mapoy
DOST Caraga Regional Director Dominga D. Mallonga
BUTUAN CITY – Mahidangat sa dakbayan sa Butuan ang kalihim sa Department of Science and Technology (DOST) subay sa pagsugod sa tulo ka adlaw nga roadshow nga gi-uloha’g Science Nation: Agham na Ramdam karong adlawa, Miyerkules, nga mahuman sa adlaw’ng Bernes, Mayo 29 ning kasamtangang tuig.

Si DOST Secretary Mario G. Montejo maoy magsilbing pinasidunggang bisita sa maong kalihokan diin gitakda kining makigtagbo sa mga kadagkoang opisyal sa rehiyonal nga buhatan ug usab sa mga piniling opisyal ning rehiyon.

Sumala ni DOST Caraga Regional Director Dominga D. Mallonga, ang pakigtagbo ni DOST Sec. Montejo ngadto sa kadagkoang opisyal, usa lamang kini sa mga highlights nga gihan-ay sa ipahigayong roadshow.


Pipila sa mga highlights sa kalihokan ang Science Forum, STARBOOKS Launching, CEST project visit sa lungsod sa Jabonga, Agusan del Norte; Inauguration and Blessing sa Complementary Food Facility sa Gigaquit, Surigao del Norte; Ground Breaking Ceremony sa Field Testing sa Integrated Gold-Copper Mineral Processing Pilot sa Del Pilar, Cabadbaran City; ug Ground Breaking Ceremony sa Philippine Science High School (PSHS) Caraga Campus nga nahimutang sa Brgy. Ampayon ning siyudad.

Gitakdang mahiabot si Sec. Montejo sa Bancasi Airport ning siyudad alas – 9:30 sa buntag ug mo padayugdog gilayon kini sa Samping Avenue alang sa pagahimuong Science Forum/Meeting.

Lauman usab nga dunay ipahigayong Installation and Memorandum of Agreement (MOA) Signing uban ang mga gobernador ug city mayor.

Gawas niana, daghan pang mga kalihokan ang nakahan-ay alayon sa nahisgutang aktibidad nga gipasiugdahan sa rehiyonal nga ahensya.

No comments:

Post a Comment