Monday, May 25, 2015

Leaflets Batok Makatakod nga Sakit Gipanghatag

Leaflets of Department of Health (DOH) Caraga.
BUTUAN CITY – Nanghatag na ang Department of Health (DOH) Caraga og mga leaflets ngadto sa publiko aron mahatagan sa mas lapad nga pagsabot kabahin sa nagkadaiyang sakit nga makuha sa pakighilawas.

Ang gihimo sa kadumalahan ni DOH Caraga Regional Director Dr. Minerva P. Molon nagsilbing inisyatiba aron mapugngan ang paspas nga pagsaka sa kaso sa HIV/AIDS dinhe sa rehiyon.

Sa nakalatid leaflet, gipasabot niini nga ang Sexually Transmitted Infection (STI), usa ka matang sa sakit nga makuha sa pakighilawas sama sa gonorrhoea, syphilis, Human Immunodeficiency Virus Infection (HIV) ug Acquired Immune Deficiency Syndrome (AIDS).

Ang HIV, usa matod pa kini ka klase sa virus nga nahimong hinungdan sa AIDS. Kinaiya sa maong virus ang paghinay sa immune system diin magpabiling himsog ang panglawas sa hingtungdan sulod sa pipila ka mga katuigan.

Samtang ang AIDS, usa kini ka kondisyon sa panglawas diin wala na kini kagahom nga mabatokan ang sakit sama sa tuberculosis, pulmonya, kanser, ug daghan pang uban nga maoy maghatod sa hingtungdan sa lubnganan.

Makatakod matod pa ang maong sakit pinaagi sa pakighilawas diin ang hingtungdan wala nagamit og condom.

Langkob niini ang anal sex, blow job, ug sex organ to sex organ.

Sulod usab sa maong leaflets kon unsaon nga malikayan ang sakit, unsa nga mga balaud nga nagpakusog pagkontrola sa sakit, ug usab ang mga sayop nga pagtuo kabahin sa HIV/AIDS.

Subay niini, nanghinaut ang kadumalahan sa rehiyonal nga buhatan sa departamento sa panglawas nga pinaagi sa gipanghatag nga leaflets, mas mapalapad ang kahimatngon sa publiko kabahin sa mga sakit nga mahimong ikamatay sa tawo kansang sakit makuha sa pakighilawas.

No comments:

Post a Comment