Saturday, May 30, 2015

Technology Innovation Gipakusgan

Ni Alex Mapoy
DOST Sec. Mario Montejo naghingusog nga pinaagi sa technology inovation, isa isa nga masulbad ang nagkadaiyang suliran ug mahimong produktibo ang nasod. Photo by Alex Mapoy
BUTUAN CITY – Malaumon ang kalihim sa Department of Science and Technology (DOST) nga mahatagan sa tukma nga kasulbaran ang mga nag-unang isyu o suliran nga nasinatian sa katawhan sa matag komunidad.
Gi-angkon sa kalihim nga kini nga tinguha makonsidera nga dakong hagit sa ahensya kon unsaon pagkab-ot gamit ang mga inisyatiba aron gawas nga mahatagan sa tino nga kasulbaran ang gi-atubang nga mga isyu, mahimo usab nga produktibo ang nasod.

Sumala ni DOST Sec. Mario Montejo, positibo ang ahensya nga isa – isa nga mahatagan sa tino nga sulbad ang nagkadaiyang suliran pinaagi sa malahutayong paghimo og inobasyon sa teknolohiya.

Dugang ni Sec. Montejo, isa sa mga gipaningkamotan sa ahensya nga sa sunod tuig 2016, matag munisipyo mabutangan og iskolar aron mas mapasayon ug ma-localize ang paghatag kasayoran kabahin sa dagan sa panahon.

Pamugos sa kalihim, ang ahensya dunay gipalambo nga estratihiya o mga pamaagi aron ang maong tinguha mahatagan sa tino nga katumanan.

Gawas niana, gipaningkamotan sa ahensya nga mahimong malambuon ang rehiyon sa Caraga sa ingon mapalambo ang kahimtang sa pamuyo sa mga Caraganons.

Mas gitutukan usab sa rehiyonal nga buhatan, sumala sa kalihim nga mahitupngan o maapsan ning rehiyon ang gihimong mga inobasyon sa silingang mga nasod.

Lantaw sa kalihim, mahimong magamit ang abundang rekursos naturales ning rehiyon aron makagama sa mapuslanong produkto nga magamit alang sa pagahimuong pagtuon.

Subay niini, gidasig sa kalihim ang katawhang Caraganons nga kaakohan sa tanan nga panalipdan ang kinaiyahan sanglit mao kini ang magsilbing puhonan alang sa malahutayon nga tingusbawan.

Paneguro sa nahisgutan nga dulot-bukog nga mabati sa katawhan ang paningkamot sa goberno nga wala nagpasagad ang kagamhanan pagpangita og mga pamaagi aron mahatagan og sulbad ang gisagubang nga mga problema pinaagi sa pagpakusog sa teknolohiya.

Sa paglibot sa grupo sa kalihim nga gibansagang Science Nation Tour, nakatutok kini sa paglambigit, pagdasig, ug pag-convert kansang tinguha nga makakab-ot sa mas epektibo nga estratihiya o pamaagi aron mahimong mas malambuon ang Pilipinas.  

No comments:

Post a Comment