1st Over The Counter Pay-out Gikalipay

Ni Alex Mapoy 

First Over The Counter (OTC) pay-out. DSWD Caraga Photo File

BUTUAN CITY – Gikalipay sa mil saysentos (1,600) ka mga benepisyaryo sa Pantawid Pamilyang Pilipino Program (4Ps) sa Department of Social Welfare and Development (DSWD) Field Office Caraga ang gihimong inobasyon sa sistema pagtunol sa tabang pinansyal.

Nasayran nga nagpahigayon og over the counter (OTC) pay-out ang rehiyonal nga buhatan ngadto sa mga benepisyaryo sa 4Ps diha sa Doongan Complex sa nakalabay’ng semana.

Gihimo kini uban sa pag-abag sa Civil Society Organizations (CSO) ning siyudad.

Gipaabot ni DSWD Caraga 4Ps Information Officer II Ryan Malbas Tapayan, gipasabot ni Regional Director Minda B. Brigoli, CESO III, katuyuan niini nga matudluan sa rehiyonal nga buhatan ang mga benepisyaryo samtang dawaton ang tabang pinansyal.

Dugang ni Brigoli, namatikdan sa nanglabay nga pay-out nga taas kaayo ang linya sa mga benepisyaryo diin igo lang naghulat kanus-a ang ilang turno nga makuha ang tabang pinansyal samtang wala kini laing gibuhat.

Pipila sa gikalingawan sa mga benepisyaryo samtang gidawat ang ayudang pinansyal – ang instalasyon sa booths, financial literacy orientation, setting up sa child friendly spaces, paghisgot kon unsaon nga mahimong aktibong resident, ug pagpadayag sa nagkadaiyang kasinatian sa mga parent leaders alayon sa estorya sa kausaban sa pamuyo nga natagamtaman sukad natabangan sa kagamhanan ilawom niini nga programa.

Nahimong kaabag sa nahisgutang aktibidad ang PASCRES-Caraga, BPI Globe Banko nga naghisgut sa financial literacy, The Generics Pharmacy (TGP) nagtuki sa Health Tips/Teaching on Lifestyle Illnesses, USWAG Coop Farmers naghisgot sa Mushroom Growing, ug ang Butuan City Association of PWDs nagpakaon sa kabataan nga nag-edad 3 hangtod 4 anyos.