PO1 Drug Protector?

Ni Alex Mapoy 

L-R:  PDEA Caraga Regional Director Julius R. Navales and  PRO 13 Spokesperson PSupt. Martin Gamba.
All Photo by Alex Mapoy

BUTUAN CITY – Wala gibasura sa kadumalahan sa Police Regional Office (PRO) 13 ang posibilidad nga dunay pipila ka mga opisyal sa kapulisan ang nahimong protector sa mga drug pushers ning rehiyon.

Una nang gikomperma sa liderato sa Philippine Drug Enforcement Agency (PDEA) Caraga nga nakadawat og impormasyon ang rehiyonal nga buhatan nga dunay pipila ka mga pulis ning rehiyon ang nahimong drug protector.

Sumala ni PDEA Caraga Regional Director Julius R. Navales, ang nahisgutang impormasyon ang ila pa kining ipailawom sa makuti nga pakisusi aron masuta kon tinuod ba ang maong impormasyon nga ilang nadawat.

Dugang ni Navales, basi sa nadawat niining kasayoran, kasagaran nga pulis nga nagsilbi matod pang protector sa drug pushing activity ning rehiyon ang nagranggo og Police Officer 1 (PO1).

“There are some law enforcers who are engaged minsan promotekta sa mga drug dealers. So, we really conduct an investigation. Usually mga kuan, PO1 (Police Officer (PO) 1). Pero, hindi pa yan confirm, eh. May mga reports lang tayo na natanggap. That’s why, we conduct an investigation kung talaga bang nagpoprotekta sa ganitong bagay,” pahayag ni Dir. Navales.

Sa bahin usab ni PRO 13 Spokesperson PSupt. Martin Gamba, gipahayag sa opisyal nga posible dunay pulis ang nahimong protector sa illegal drug pushing activity sanglit kaniadto adunay nalambigit.

Dugang ni Gamba, hugot nilang gipanubayan ang nanggawas nga impormasyon bahin sa maong hisgutanan.

Gitin-aw sa opisyal, ang liderato ni PRO 13 Regional Director PCSUPT David Ombao, wala nag-tolerate sa maong matang sa binuhatan.

Ang pagka-protector sa drug pushing activity sa usa ka pulis ang hugot kining gikondina sa han-ay sanglit naghatag lamang kini og mantsa sa dungog sa kapulisan.

Kadtong pulis nga mapamatud-an nga nahimong protector sa drugas, angayang manubag sa salaud nga nahimo ug mahimo pa kining masuspendi o kaha tanggalon sa serbisyo.

Subay niini, nanawagan ang opisyal sa publiko nga kon dunay mahibaw-an nga pulis nga nahimong drug protector, mas maayong isumbong kini sa pinakaduol nga presento o kaha i-text direkta sa Camp Crame PNP Hotline ug i-send sa 2920 ug itug-an ang tinuod nga pangalan sa maong pulis ug insaktong lokasyon aron dali kining ma-beripika.