TESDA Personnel Gipasabot sa ISO

Ni Alex Mapoy

TESDA-Caraga Regional Dir. Florencio F. Sunico, Jr. talks on the
rationale of the conduct of the activity. Courtesy of TESDA Caraga

BUTUAN CITY – Mas gipalawman sa kadumalahan sa Technical Education and Skills Development Authority (TESDA) Caraga ang pagpasabot sa pinakaulahi nga katikaran kalambigitan sa ISO 9001:2008 certification sa ahensya.

Subay niini, tanang opisyal ug staff sa nagkadaiyang operating units sa ahensya ang gipailawom sa ISO Capability Build-Up Workshop dinhe sa dakbayan sa Butuan sa nakalabay’ng adlaw.

Gipahayag ni TESDA Surigao del Norte Supervising TESD Specialist Abegail Eupeña, mas daling nasabtan sa mga nitambong sa maong kalihokan sanglit ang nahimong resource speaker nihatag sa mga practical nga scenario lambigit sa auditing.

Dugang ni Eupeña, ang nakat-onan sa maong tigum magsilbing giya sa kaugalingon labi na sa tanang “process owners” ug “internal auditors” sa higayon nga dunay ipahigayong pag-audit.

Sa kabahinan ni TESDA Caraga Regional Director Florencio F. Sunico, Jr. basi sa impormasyon nga gipaabot ni TESD Specialist 1 Robert Roperos, gipasabot sa opisyal nga nag-unang katuyoan sa aktibidad mao ang pagseguro nga tanang personahe mohimo sa tahas puntirya sa usa lamang ka tumong.

Pamugos ni Dir. Sunico, angayan lamang nga pareha ang pagsabot sa matag personahe sa ISO 9001:2008 certification.

Gituki ni TESDA Quality Management System (QMS) Consultant Allan Fabella, sa tulo ka adlaw nga kalihokan ang Practical Internal Auditing, Standard QMS terms, 8 Quality Management Principles, Principles of Internal Audit, Internal Audit Cycle, Internal Auditing, PDCA Principle in Internal Auditing, ug Corrective and Preventive Actions.

Si Fabella maoy nagsilbing mamumulong sa maong aktibidad diin ang gituki nga hisgutanan nakapuntirya sa Practical Internal Audit pinasikad sa nakalatid sa ISO 19011:2011.

Ang nahisgutang kalihokan gihimo sa ahensya isip kabahin sa Staff Development Program isip suporta sa Human Development Cluster sa Philippine Development Plan (PDP) ni Pangulong Benigno S. Aquino III.