BUTUAN
CITY
– Pormal nang sugdan sa Committee on Justice & Human Rights joint with
Committee on Cultural Communities ang duha ka adlaw nga “Senate Probe on Lumad
Killing” sa Mangcagangi and Linungao Halls, Villa Maria Luisa (VML) Hotel sa
dakbayan sa Tandag karong adlawa, ala-1:00 sa hapon ug ugma, adlaw’ng Bernes.
Sa impormasyon sa Philippine
Information Agency (PIA) Caraga pinaagi ni Jennifer P. Gaitanom pangunahan ni
Senator Teofisto “TG” Guingona III ang nahisgotang pagdungog uban ang 12 ka dinapit
nga mga resource persons nga maglangkob nila AFP chief of staff Gen. Hernando
Iriberri, PNP chief Gen. Ricardo Marquez, CHR chair Jose Luis Martin “Chito”
Gascon, Atty. Leonor Oralde-Quintayo, DILG Secretary Mel Senen Sarmiento, DSWD
Sec Dinky Soliman, DepEd Sec. Armin Luistro, DOJ Sec. Leila De Lima, ug DND
Sec. Voltaire Gazmin.
Dunggon sa Senado ang mga kremin
nga nahitabo sa probensya sa Surigao del Sur labi na ang brutal nga pagpatay
ngadto sa mga biktimang Alternative Learning Center for Agricultural and
Livelihood Development (ALCADEV) Executive Director Emerito Samarca,
Malahutayong Pakigbisog Alang sa Sumusunod (MAPASU) Lider Dionel Campos, ug Aurelio
Sinzo.
Gitumbok sa mga bakwit nga ang
nihimo sa brutal nga pagpatay mao ang pipila ka membro sa Bagani Forces sama
nila Bobby Tejero, Loloy Tejero, Gareto Layno, ug laing 20 ka mga kaubanan
kinsang pangalan ang padayon pang giila.
Subay niini, nanghinaut ang kabanay
sa mga biktima lakip ang mga bakwit nga mahatagan sa tino nga hustisya ang mga
biktima ug masilotan ang mga responsable.
Una nang gi-alegahan sa
Karapatan Caraga nga ang Bagani Force, gi-organisa sa militar, apan dali kining
gihimakak sa habig sa kasundalohan.
No comments:
Post a Comment