Symposium Batok El Niño Gihimo

Ni Alex Mapoy

Symposium. Isa-isa nga gipasabot sa water district ang peligrosong epekto kon magpasagad ang mga residente sa pagpanalipod sa kinaiyahan ug sa watershed area. Photo courtesy of BCWD

BUTUAN CITY – Gipaningkamotan sa Butuan City Water District (BCWD) nga dili masinatian ang epekto sa El Niño sa watershed area hinungdan nga nihimo ang water district og mga lakang isip kabahin sa mitigating measures.

Isa sa mga nagsilbing panagang sa huwaw mao ang pagpahigayon og Watershed Symposium sa Multi-Purpose Hall sa Sitio Tagkiling, Barangay Anticala ning siyudad ang water district kinsa direktang gi-eduka ang mga residente sa maong dapit.

Nalantawan sa water district nga kon ma-eduka lamang ang mga residente, mahimong epektibo ug reyalistiko ang kampanya nga mabatokan ang posibleng epekto sa huwaw ngadto sa watershed.

Gikabutyag ni BCWD Senior Public Relations Officer Ramil S. Barquin, daghang mga isyu ang gituki atol sa maong kalihokan adtong Bernes diin isa niini mao ang posibleng peligro kon dili mapanalipdan ang tinubdan sa tubig.

Kabahin sa pagpanalipod sa kinaiyahan mao ang pagdiga sa water district sa contour farming nga pamaagi.

Nakita sa water district nga mas luwas ang maong pamaagi sanglit mapugngan ang yuta sa posibleng pagdahili.

Gawas niana, mapanalipdan usab ang kinaiyahan ug ma-preserba ang tinubdan sa tubig sa maong sistema sa pagtikad sa yuta.

“BCWD conducted a Watershed Symposium this morning at the Multi-purpose Hall, Tagkiling, Anticala. Attended by Tagkiling residents and farmers, the Symposium tackled issues and concerns of the Taguibo Watershed and the danger of not protecting the watershed. Also discussed was contour farming to help farmers engage in safe farming while protecting and conserving the watershed,” pamahayag ni Barquin.