13th Month vs Lugi, Ihatag - NLRC

Ni Alex Mapoy

Caraga Administrative Officer V Robert M. Aying

BUTUAN CITY – Dili himuong rason sa employer nga alkansi kini sa negosyo aron makalikay paghatag sa 13^th Month Pay ngadto sa mga empleyado.

Gikabutyag ni National Labor Relations Commission (NLRC) Caraga Administrative Officer V Robert M. Aying, alkansi man ang negosyo, gimandoan sa Presidential Decree 851 o mas nailang 13^th Month Pay Law ang tanang employer paghatag sa makiangayon nga 13^th Month Pay kada tuig.

Dugang ni Aying, pinakaubos nga rekisitos aron ang empleyado makadawat sa maong kalipayon mao ang pagtrabaho og isa ka bulan.

Pamugos sa opisyal, dili puwede nga ilaron sa employer ang empleyado nga dili kini hatagan og 13^th Month Pay sanglit isa pa kini ka bulan nagtrabaho sanglit dunay balaud nga nagkantar niini nga angay hatagan.

Sa higayon nga hikawan sa employer ang yanong empleyado sa maong benepisyo, mahimo kining isumbong sa NLRC sanglit ang gihimo sa management makonsidera nga dakong kalapasan sa PD 851.

Basi sa balaud, ihatag ang maong benepisyo sa dili mo lapas ang Disyembre 24 kada tuig.

“All employers are required to pay their rank and file employees thirteenth-month pay, regardless of the nature of their employment and irrespective of the methods by which their wages are paid, provided they worked for at least one (1) month during a calendar year. The thirteenth-month pay should be given to the employees not later than December 24 of every year,” pahayag ni Aying.