Alegasyon sa Mayor, Gihimakak

Ni Alex Mapoy

BUTUAN CITY – Gipanghimakak ni Congressman Lawrence Fortun ang tulo ka isyu nga gibato ni Butuan City Mayor Dr. Ferdinand Amante, Jr.  nga siya traydor sa partido, nagpagawong sa negosyante, ug mangingilog og proyekto.

Hisayran nga atol sa deklarasyon ni Mayor Amante sa nakalabay’ng semana nga suble kining magpapili sa maong posisyon sunod tuig, walay lipud-lipod nga gisaway ug gihinganlan sa amahan ning siyudad si Cong. Fortun nga traydor sa partido, nagpagawong sa negosyante, ug mangingilog og proyekto.

Sumala ni Cong. Fortun, gisakitan siya sa nahimong batikos ni Mayor Amante batok kaniya pulos mga bakak ug walay kamatuoran.

Gitin-aw sa kongresista, wala siya nag-traydor sa partido sanglit alang kaniya, gitratar na niya kining pamilya.

Tuig 1991, estudyante matod pa siya niadto, nagtrabaho na kini sa isa sa mga haligi sa maong partido hangtod nisulod sa pulitika ug bisan karon nga siya kongresista, wala siya nihawa sa partido sanglit pabilin siyang nagpasilong niini.

Gidaut siya matod pa sa kongresista sa mga bag-o lamang sampa sa partido nga siya nagpasilong kang Vice-President Jejomar Binay, apan wala nilampos ang mga nahisgotan sanglit siya ang pabiling gidapigan sa partidong Liberal.

Dako usab nga bakak alang sa kongresista ang pasangil nga siya nagpagawong sa negosyante sanglit alang kaniya, ni bisan kanus-a, wala siya nagpagawong kang bisan kinsa ug wala sa iyang pagkatawo nga yanong magawngan.

Bakak usab matod pa ang gipasangil kaniya nga mangingilog og proyekto sanglit adtong nitambong siya sa turnover ceremony sa Brgy. Bitan-agan, igo lang siya nga giimbitar niadto ug nagdahom nga iyang maabtan si Mayor Amante nga atua sa maong dapit, apan dihang siya nahiabot, walay laing opisyal nga nakatunga kondi siya lang.

Adtong tungura, gikan pa siya sa kaulohan ug paghidangat niya sa Bancasi airport, igo lamang siya gisugat sa iyang staff ug giingnan nga duna kini imbitasyon hinungdan nga iyang gi-adtoan.

Gani, atol matod pa sa iyang paghatag mensahe, gipasalamatan pa niya si Mayor Amante nga usa sa mga naghingosog nga mahatagan og katumanan ang maong proyekto.

Dili lang matod pa si Mayor Amante ang iyang gipasalamatan kondi ang Department of Agriculture (DA), Department of Public Works and Highways (DPWH), katawhan ning siyudad, ug bisan gamay, wala niya angkona nga iya kadto nga proyekto.

Pamugos sa opisyal, dili niya batasan nga mangangkon o mangilog og proyekto dungan sa pagtin-aw nga tanang gipatuman niining proyekto, wala niya angkona o kaha nagpabutang og tarpaulin aron ibandera ang mga pulong, “A priority project of Cong. Fortun” sanglit alang kaniya, ang maong proyekto --- proyekto sa katawhan ug dili iyaha.

Ang pagtubag ni Cong. Fortun sa mga isyu nga gibato kaniya, gihimo aron malimpiyohan ang iyang pagkatawo dungan sa pagtin-aw nga dili niya kinaiya ang pagdaut sa iyang mga kaatbang sa pulitika.