NPA Member, Gidasig sa Rebel Returnees

Ni Alex Mapoy

BUTUAN CITY – Angayang mobalik na sa sabakan sa kagamhanan ug biyaan ang armadong pakigbisog aron makabaton sa hapsay, malinawon, ug malamboon nga pamuyo.

Awhag kini sa tanang rebel returnees ngadto sa mga kanhi kaubanan nga padayon pang naglihok sa kabukiran ug padayong nag-asdang sa armadong pakigbisog.

Gikabutyag ni Caleb “Ka Ryan” Lanaban, kanhi platoon kumander sa Militia ng Bayan  sa rebeldeng New Peoples Army (NPA), mintras duna pay igong higayon ug wala pa nalagas sa panggubatan ang kinabuhi, mas maayong mobalik na ang kanhi mga kaubanan sa sabakan sa balaud.

Dugang ni Lanaban, gigamit lamang sa komunistang grupo ang kanhi mga kaubanan sa kalihokan tungod ug alang sa personal niining interes.

Gitin-aw ni Lanaban, ang kagamhanan naningkamot pagtunol sa nagkadaiyang serbisyo ingon man mga proyektong pangkalamboan sa pinakasuok nga dapit aron lamang matunol ang batakang mga serbisyo nga angay matagamtaman sa tanan.

Ang nahisgotang mga serbisyo ug programa, gihikaw sa komunistang partido ug padayong gihiloan ang panghunahuna, matod pa ni Lanaban ang mga kanhi kaubanan sa kalihokan aron ipadayon ang pakig-gubat sa goberno ug labing pait, duna pay kinabuhi sa mga sibilyan ang madamay.

Sa bahin ni Julieto “Ka Boom” Canoy, kinsa kanhi nagsilbing kumander sa rebeldeng grupo ug naglihok sa komunistang partido sulod sa 31 ka tuig, hugot nga nag-awhag sa mga kanhi kaubanan nga ihunong na ang armadong pakigbisog sanglit wala kini makab-ot nga kaayohan ug dili usab kini makahatag kalinaw sa katilingban.

Gitin-aw ni Canoy, sa higayong talikdan sa kanhi mga kaubanan ang walhong grupo, maseguro pa niining maangkon ang usa ka malipayon, hapsay, ug legal nga pamuyo sanglit dili naman kini magtago-tago pa sa balaud.

Emosyunal usab nga nagdasig si Elena Cometa sa mga kanhi kaubanan sa rebeldeng grupo nga talikdan ang maong pundok ug ipadayon ang pag-asdang sa pagkab-ot sa malamboon nga pamuyo ug puy-an sa pamilya ang gugma aron maghari ang kalinaw sulod sa panimay ingon man sa katilingban.

Si Cometa, usa ka yano nga mag-uuma nga nagtikad sa gamay niining luna, apan nabiktima sa inhustisya hinungdan nga nisampa kini sa kalihokan, apan sa kaulahian, nahigmata kini nga sayop ang iyang apil sa grupo sanglit mas nisamot pa kagubot ang pamuyo niini.