Tuesday, September 29, 2015

Kagubot sa Tribo, Angayang Sulbaron - VICTIM

Ni Alex Mapoy

VICTIM Convenor Arthur Tariman
BUTUAN CITY – Tinguha sa Victims of Injustice, Criminality & Terrorism in Mindanao (VICTIM) nga mahunong na mahunong ug mahatagan sa tino nga kasulbaran ang nikaylap nga kagubot sulod sa tribo ning rehiyon hinungdan kini nanginlabot.

Gikabutyag ni VICTIM Convenor Arthur Tariman, angayan nga magtinabangay ang Armadong Kusog sa Pilipinas, mga piniling opisyal sa kagamhanan, ug lideres sa mga lumad aron mahatagan sa mas paspas ug komprehensibong sulbad ang maong kagubot.

Dugang ni Tariman, mahatagan lamang og sulbad ang maong kagubot pinaagi sa paghimo og lakang nga haum sa pamaagi sa tribo – ang pagpahigayon og Tampudah (peace pact).

Sa ipahigayong Tampudah, malaumon si Tariman nga kadtong mga nagbangi nga kaliwatan sa tribo magkauli ang maayong kabubut-on pinaagi sa panagsabot-sabot sulod sa yutang kabilin.

Hisayran ang maong kagubot, nibunga sa pipila ka mga kinabuhi nga nakalas tungod sa paghuramentado sa pipila ka membro sa Bagani Forces kinsa iligal nga naghupot og armas ug nagresulta sa pagpamakwit sa pipila ka mga komunidad sa lumad.

Daan nang gihimakak sa kasundalohan ang alegasyon nga sila ang nag-organisa ug nag-armas sa Bagani Force dungan sa pagpamugos nga bugtong gi-organisa ug gi-armasan ning rehiyon mao lamang ang Citizen Armed Forces Geographical Unit (CAFGU) ilawom sa superbisyon sa Cadre Battalion.

No comments:

Post a Comment