4Ps Parent Beneficiaries Gipailawom sa FDS

Ni Alex Mapoy

DSWD Caraga 4Ps Regional Information Officer II
Ryan Malbas Tapayan. Photo by Alex Mapoy

BUTUAN CITY – Daghang ginikanan nga benepisyaryo sa Pantawid Pamilyang Pilipino Program (4Ps) ang nalipay human nakasayod sa batakan niining katungod subay sa gitambongan nga Family Development Session (FDS) nga gipasiugdahan sa Department of Social Welfare and Development (DSWD) Caraga.

Isa sa mga 4Ps parent beneficiaries nga nakatambong sa maong kalihokan ang usa ka Maribeth Lozada Cagabcab, residente sa Brgy. Bacolod, lungsod sa Cagwait, Surigao del Sur.

Basi sa impormasyon ni DSWD Caraga 4Ps Regional Information Officer II Ryan Malbas Tapayan nga gikalipay pag-ayo ni Cagabcab ang tabang nga nahatag sa FDS ngadto sa kababayen-an nga mahibaluan ang batakan niining katungod.

Dugang ni Cagabcab, gikalipay niya pag-ayo nga nagpasiugda ang rehiyonal nga buhatan sa DSWD sa FDS kansa binulan kini nga gihimo isip kabahin sa inisyatiba sa pagpatuman sa ahensya sa 4Ps.

Pasigarbo pa sa nahisgutan, tungod sa FDS, duna kini nakat-onan kabahin sa batakan niining katungod ug nakadasig kini kaniya nga magpuyo ug maglihok-lihok pinasubay sa batakan niining katungod.

Gi-angkon sa nauwahi nga niadtong batan-on pa kini, wala siya nakatungha sanglit dili kaya sa iyang ginikanan sa pagasto sa iyang pag-eskwela.

Sa tabang sa 4Ps pinaagi sa pagpasiugda sa FDS, daghan siya og nakat-onan ug natudloan kini kon unsaon nga mahimong mas produktibong indibidwal labi na sa pag-alagad sa kaugalingong pamilya ingon man sa komunidad.

Sa bahin ni DSWD Caraga Regional Director Minda B. Brigoli, CESO III, giklaro niini nga sa pagpatuman sa 4Ps, kanunay’ng nakapunting ang ahensya sa kabililhon sa paghatag “protection and nurturance” ingon man sa pag-agak sa kabataang benepisyaryo nga mahimong edukado.

Gipasabot usab ni Brigoli, ang pagpahigayon sa FDS, usa ka importanteng interbensyon aron mapakusog ang kakapas sa matag membro sa pamilya nga benepisyaryo sa 4Ps sama sa ginikanan aron mahimo kining responsable sa pagtubag sa panginahanglan sa pamilya ingon man sa mga anak.

Ang FDS kabahin lamang kini sa 4Ps diin nagtumong kini nga mapalambo ang matag usab ug masilsil sa hunahuna sa matag benepisyaryo ang positibong panglantaw nga makab-ot ang tingusbawan sa kahimtang sa panginabuhi luyo sa nasinatiang kawad-on.