Kalahi Exempted sa Revolutionary Tax?

Ni Alex Mapoy

DSWD Caraga Kalahi-CIDSS Regional Information Officer III Eunice “Nice” G. Montaos. 

Photo by Alex Mapoy

SURIGAO DEL SUR – Gikomperma ni Surigao del Sur Governor Johnny T. Pimentel nga “exempted” sa “revolutionary tax” ang mga proyekto nga gipatuman sa Department of Social Welfare and Development (DSWD) Caraga ubos sa programang Kapit-Bisig Laban sa Kahirapan – Comprehensive and Integrated Delivery of Social Services (Kalahi-CIDSS).

Sumala ni DSWD Caraga Kalahi-CIDSS Regional Information Officer III Eunice “Nice” G. Montaos, gipahayag matod pa ni Gov. Pimentel nga giila sa gobernador ang nahatag nga kontribusyon sa Kalahi-CIDSS sa probensya sanglit nahimo kining paagi nga mabatokan ang insurhensiya kansang programa gipatuman sa gikonsiderang “conflict areas” diin ang rebeldeng grupo, New People’s Army (NPA), maglisod pagsingil og revolutionary tax sa matag proyekto sanglit ang pundo gibantayan pag-ayo sa komunidad nga maoy direktang benepisyaryo.

Gawas niana, gitin-aw matod pa ni Gov. Pimentel, dunay pipila ka mga local chief executives (LCEs), ang dili kaayo suportado sa paagi sa Kalahi-CIDSS sanglit ang pundo, direktang i-download ngadto sa matag komunidad diin ang hingtungdang LGU, gipangayuan usab og counterpart alang sa katumanan sa ipatumang proyekto.

Sa maong paagi, matod pa sa gobernador, wala nay higayon nga makurakot pa sa pulitiko ang gitaganang pundo sanglit ang mga residente sa komunidad nga nagsilbing benepisyaryo maoy nagbantay ug nag-ebalwit kon nadapat ba ang gigahing pundo sa proyekto nga ilang nasabotan.

Hinuon, daling giklaro sa gobernador, tanang LCEs sa probensya niining gidumala ang pulos aktibo ug todo suporta sa nasangpit nga programa butang nga gikalipay sa opisyal.

Gidasig usab sa amahan sa probensya ang tanang LCEs nga ipadayon ang mainitong pagsuporta sa Kalahi-CIDSS aron padayong mo salig ang katawhan kanila isip mga piniling opisyal sa lungsod.

Pasabot sa gobernador, diha sa pagpatuman sa proyekto kon anaa ang mainitong paglambigit sa komunidad, pagpatigbabaw sa transparensiya, ug magtunhay ang “sense of accountability” sa matag usa, segurado nga mabatokan ang bisan unsa mang porma sa kurapsyon.

Saludo usab ang opisyal sa gi-asdang nga sistema sa ahensya – ang Community-Driven Development (CDD) diin gi-angkon sa gobernador nga siya mismo ang buhing saksi kon gi-unsa pagbansay ang yanong Surigaonon aron madumala pag-ayo ang gisalig nga pundo sa ingon mapahimuslan kini sa kinabag-an.

Asoy matod pa sa opisyal, mismo, isa ka sentabo gikan sa pundo, ang wala kini na usik sanglit nadapat kini ngadto sa sub-project ug labaw sa tanan, i-likwidit ug i-report usab kini ngadto sa komunidad pinaagi sa pagpahigayon og asembliya sa barangay.