BUB Scholars, Nigradwar

Ni Alex Mapoy

BUB Scholars from Kitcharao, Agusan del Norte pose with officials of TESDA-Agusan del Norte and the municipal government of Kitcharao during the Graduation Ceremonies held recently at the Kitcharao municipal hall.  

Courtesy of TESDA Agusan del Norte

KITCHARAO, Agusan del Norte – Sangko sa langit ang gibating kalipay sa mga iskolar nga bag-o lamang nahuman sa gisalmotan nga “skills training”  nga gipasiugdahan sa Technical Education and Skills Development Authority (TESDA) Agusan del Norte.

Basi sa datos, mokabat sa kinatibuk-ang 122 ka mga iskolar ang napailawom sa maong training kansang pundo gikuha gikan sa Bottoms Up Budgeting (BUB).

Sa impormasyon nga gipaabot ni Catalina O. Tacubao sa TESDA Agusan del Norte, sa kinatibuk-ang ihap sa mga benepisyaryo, daghan ang nakahuman sa Shielded Metal Arc Welding NC-II ug Driving NC II.

Ang mga nahisgutan didto kini nagpailawom sa training sa Candelaria Institute of Technology (ICT) nga nahimutang sa dakbayan sa Cabadbaran sakop sa nahisgutang probensya.

Dugang ni Tacubao, ang ubang trainees ang nakahuman sa “Prepare Hot Meals leading to Cookery NCII” kinsa nagbansay sa Provincial Training Center (PTC) sa samang siyudad.

Gipasabot matod pa ni TESDA Agusan del Norte OIC Provincial Director Emma R. de Villa ngadto sa tanang nanambong sa graduation sa mga nahisgutan, ang maong proyekto gihanyag nga libre ngadto sa mga indibidwal nga gustong makakat-on sa “technical-vocational (tech-voc) education” labi na kadtong walay ikasarang pagasto sa pagtungha sa kolehiyo, apan angayan nga tabangan.

Dugang ni De Villa, gipatuman nila sa probensyal nga buhatan ang nahisgutang proyekto isip tubag sa gipakusgang kampanya sa administrasyong Aquino ang “Education for All.”

Gipaneguro sa opisyal nga subay sa kalamposan sa mga nahisgutan, nahatagan kini sa mas hayag nga oportunidad nga daling makasulod og trabaho, lokal man o sa abroad nga pangimpleyo.

Ang nahisgutang mga benepisyaryo pulos mga residente sa lungsod sa Kitcharao hinungdan nga didto sa Municipal Gym gipahigayon ang graduation ceremony nga gitambongan ni Kitcharao Vice Mayor Jenry E. Montante uban ang tanang membro sa Sangguniang Bayan sa naasoy’ng lungsod.