Mining sa Caraga, I-Ban?

Ni Alex Mapoy

Surigao del Norte Governor ug kasamtangang RDC Caraga Chairwomen Sol Matugas.

BUTUAN CITY – Daghang gobernador sa Pilipinas ang nipapanday og ordinansa aron ihunong ang mining activities sa gi-alagarang probensya.

Sa rehiyon sa Caraga, ang liderato sa Regional Development Council (RDC)  Caraga, walay plano nga i-ban ang pagmina sa halapad nga kayutaan ning rehiyon.

Pagklaro kini ni Surigao del Norte Governor ug kasamtangang RDC Caraga Chairwomen Sol Matugas ngadto sa mga media practitioners atol sa pagbisita ni DOST Secretary Mario Montejo dinhe sa dakbayan.

Sumala ni Gov. Matugas, dili kinahanglan nga i-ban ang mining activities sa probensya o bisan sa tibuok rehiyon sanglit mao kini nagpakusog sa ekonomiya.

Dugang ni Gov. Matugas, ang industriya sa mina sa iyang probensya naghatag og dakong oportunidad sa mga Surigaonon ug bisan sa mga Caraganons nga makasulod og trabaho.

Nalipay pa kini nga gumikan sa pagsulod sa industriya sa mina sa probensya, daghang Surigaonon ang nakabaton og trabaho ug nakabaton sa igong “purchasing power” alang sa batakan niining panginahanglan.

Gitin-aw sa gobernadora, hugot usab ang iyang pagtuo nga tanang kompanya sa mina nga anaa sa Surigao del Norte ang nagtamod sa gitawag nga “Responsible Mining” hinungdan nga walay igong rason nga i-ban ang mining activities sa probensya.

Lantaw sa opisyal, wala nakaguba sa “mother earth” ang industriya sa mina sa probensya ug nakahatag pa kini og kaayohan sa mga residente.

Alang sa inahan sa probensya, “there is something good in mining” hinungdan nga walay igong rason nga magpanday og ordinansa ang probensya aron lamang mo sundog sa gihimong lakang sa pipila ka probensyal nga kagamhanan nga i-ban ang pagmina sa rekursos naturales.