P2.93-M nga Makina Gitunol

Ni Alex Mapoy

FARM MECH FOR FARMER ASSOCIATIONS. Regional Director Edna M. Mabeza (7th person from left) together with the recepients of farm machineries worth P2.93 million. Courtesy of Rhea Abao

BUTUAN CITY – Gilauman nga mo taas ang produksyon ug maminusan ang gastos sa mga mag-uuma nga membro sa Farmers’ Association and Irrigator’s Association human nadawat ang makinarya nga magamit sa pagtikad sa basakan sa nakalabay’ng bulan.

Sumala ni Department of Agriculture (DA) Caraga Information Officer Rhea C. Abao, 20 ka mga yunit sa water pump ug engine set ang natunol ngadto sa 20 usab ka mga hugpong sa mga mag-uuma nga na gikan sa nagkadaiyang bahin ning rehiyon.

Basi sa datos, 10 ka mga water pump ug engine set ang natunol ngadto sa kapunongan sa mga mag-uuma sa Agusan del Sur, 5 sa dakbayan sa Butuan, 1 sa Agusan del Norte, 3 sa Surigao del Sur, ug 1 sa Province of Dinagat Islands.

Dugang ni Abao, ang gidawat nga mga makina sa hugpong sa mga mag-uuma kabahin kini sa mas gipakusgan nga farm mechanization sa gobernong Aquino nga gipatuman sa rehiyonal nga ahensya pinaagi sa Agri-Pinoy Rice Program.

Pasabot sa opisyal, tumong sa paghatag sa maong matang sa makinarya nga mapataas ang kalidad sa panginabuhian sa mga Caraganon nga mag-uuma.

Gipangunahan ang paghatag sa maong mga makina ni DA Caraga Regional Director Edna M. Mabeza uban sa pag-abag sa Regional Agriculture Engineering Division (RAED) ug gisaksihan nila Integrated Laboratories Division Chief John E. Gamboa, Sr.  ug Field Operations Division Chief Rebecca R. Atega.

Butyag ni Mabeza, dakong tabang ang maong mga makina nga maminusan ang galastohan sa mga mag-uuma sa pagtikad sa yuta ug niana, malaumon kini nga mo taas ang kita sa mga nahisgutan.

Nagkantidad ang natunol nga mga makina og P2.93 milyones.

Gawas niana, nadawat usab sa nahisgutang mga benepisyaryong kapunongan ang mga rice threshers diin basi sa patakaran, 85% sa kantidad sa maong makina ang abagahon sa goberno samtang ang nahibiling 15% ang abagahon sa benepisyaryo.

Pasabot pa sa opisyal, ang nahatagan sa nahisgutang mga makina mao lamang kadtong nakahatag proposal sa rehiyonal nga buhatan.