P12-M sa Stock Infusion Nagpadayon

Ni Alex Mapoy

DA Caraga Livestock Banner Program Coordinator
Dr. Rochie Rey Barrios. Photo by Alex Mapoy

BUTUAN CITY – Dose milyones pesos (P12-milyones) nga kantidad sa nagkadaiyang klase sa mananap ang itunol sa rehiyonal nga buhatan sa Departamento sa Agrikultura ngadto sa nagkadaiyang organisasyon ning rehiyon.

Hisayran nga gisugdan ang “stock infusion” adto pang bulan sa Marso ug lauman nga mahuman kini karong bulan sa Agosto sa kasamtangang tuig.

Gikabutyag ni DA Caraga Livestock Banner Program Coordinator Dr. Rochie Rey Barrios, ang mahatagan nga organisasyon mao lamang kadtong naghatag proposal sa rehiyonal nga buhatan samtang kadtong wala naghatag proposal ang dili mahatagan.

Dugang ni Dr. Barrios, ang mahatagan nga organisasyon mao lamang kadtong rehistrado sa Department of Social Welfare and Development (DSWD) sanglit mao kini ang bag-ong patakaran nga gipatuman sa nasudnong panggamhanan.

Giklaro sa opisyal, bisan rehistrado pa ang organisasyon sa Security and Exchange Commission (SEC), dili gihapon kini mahatagan sa gisumite nga proposal kon dili kini rehistrado sa DSWD.

Bag-o kini nga patakaran nga gipatuman sa rehiyonal nga ahensya subay na usab sa kamanduan gikan sa kaulohan.

Ang pagtunol sa kahayopan dili makonsidera nga matag lungsod o siyudad sanglit ang gibasehan sa rehiyonal nga buhatan mao ang proposal nga gipaabot sa matag organisasyon.

Nanghinaut na lamang ang opisyal nga ang gipanghatag nga mga kahayopan ang alimahan pag-ayo aron kini makatabang sa ekonomikanhong aspeto.

Sa nanglabay nga katuigan, ang stock infusion naila kaniadto nga animal dispersal, apan ang konsepto niini ang susama lamang sanglit mga mananap lang gihapon ang ihatag ngadto sa magsilbing benepisyaryo.