Gamit Ang Dummy, Turista Nagnegosyo?

Ni Alex Mapoy

BOI Caraga Acting Alien Control Officer Cesar Valdez. Photo by Alex Mapoy

BUTUAN CITY – Ipailawom sa makuti nga pagpanubay sa kadumalahan sa Bureau of Immigration (BOI) Caraga ang nasagap nga impormasyon nga dunay pipila ka mga langyaw’ng turista ang nahimong financier sa small scales mining ning rehiyon.

Sumala ni BOI Caraga Acting Alien Control Officer Cesar Valdez, basi sa nadungog-dungog, dunay pipila ka mga langyaw’ng turista ang nigamit og dummy aron dili kini mahibaw-an nga maoy nibubo og puhonan.

Dugang ni Valdez, posible nigamit og dummy ang langyaw’ng turista aron matago ang personalidad niini labi pa nga ilawom sa batakang balaud sa Pilipinas, hugot nga gidid-an ang mga langyaw’ng turista nga mag-negosyo dinhe sa nasod, gawas na lamang kon i-konberter ang nahuptan niining tourist visa ngadto sa commercial visa.

“Actually, to hide their personalities, seguro nigamit sila og mga dummies para dili makita nga tourist sila. Actually ang tourist man gud in and out. Mo anhi sila sa office just to file an extension,”pamahayag ni Valdez.

Ang nasagap niining impormasyon, gitin-aw sa opisyal, ang hugot nilang gi-imbestigahan aron masuta ug mailhan kinsa kining gikaingong mga langyaw’ng turista nga nahimong financier sa small scales mining.

Gi-angkon sa opisyal, bisan nakasagap sila sa maong impormasyon, apan, hangtod ning mga gutlo-a, wala pay ni bisan isa ka report nga magtumbok sa pangalan sa langyaw’ng turista nga nahimong financier niining matanga sa negosyo.

Pasabot sa opisyal, lisod ilhon ang identity sa langyaw’ng turista kon ugaling tinuod, nga nahimong financier niining matanga sa negosyo, gawas na lamang kon ang gihimo niining dummy mo barug ug personal nga mo ila sa langyaw’ng turista nga kini maoy iyang financier.

Bisan pa kon dunay mo ila nga kining langyaw nga turista maoy financier niining negosyoha, lisod usab kining i-prubar sanglit nanginahanglan kini og lig-ong ebidensya.

“Actually, walay na report nga dunay tourist nga nag-put up o nag-engage og mining. Seguro, dunay mga tourist nga nag-financier sa small scales mining, basi sa akong nadungog-dungog pero kini nga report, subject for validation, verification, and confirmation,” pagklaro sa opisyal.