Matba – Pagaspas Line-Up Giluto

Ni Alex Mapoy

BUTUAN CITY – Padayong giluto karon ang paghiusa sa grupo nila Agusan del Norte Governor Ma. Angelica Rosedell Amante – Matba ug Buenavista Mayor Norbert Pagaspas alang sa nagsingabot nga piliay 2016.

Mismo si Mayor Pagaspas ang nagbutyag adtong Sabado atol sa weekend program sa opisyal sa Radyo Trumpeta nga duna kini “merger proposal” ngadto sa grupo ni Gov. Matba ug sa iyang grupo nga Team Pabor.

Komperma ni Mayor NBP, padayon pang giluto ang posisyon sa ilang grupo sa gobernadora dungan sa pagpaneguro nga mahibaw-an ra ang resulta sa umaabot nga mga adlaw.

Gitin-aw sa mayor, ang nakab-ot nga desisyon magkahulogan nga dunay ma-sakripisyo, apan ang maong lakang matod sa opisyal, iyang napanglantawan nga maoy dalan nga mahatagan sa katumanan ang pangandoy nga mahimong mas malamboon ang lungsod sa Buenavista diin andam siya nga mo sakripisyo alang sa kaayohan sa lungsod nga gidumala.

Una nang nanggawas ang balita sa nanglabay’ng mga bulan nga posibleng mag-uban ang Kusog Agusanon ni Cong. Erlpe John Amante ug Team Pabor ni Mayor NBP human naputol ang maayong relasyon sa magsuong Amante.

Ang pamahayag sa mayor maoy naghatag katin-awan sa nanggawas nga balita nga dili tinuod nga mag-uban sila Cong. Amante ug Mayor NBP kondi ang mag-uban sa umaabot nga bugnong lugaynon sila Gov. Matba ug Mayor NBP.