Watershed Pabiling Isyu

Ni Alex Mapoy

SYMPOSIUM. Gipasabot sa Butuan City Water District (BCWD) ang kabililhon sa pagkonserba sa tinubdan sa tubig sa watershed area. Photo courtesy of BCWD

BUTUAN CITY – Padayong gi-atubang sa Butuan City Water District (BCWD) ang isyu sa tinubdan sa tubig ning siyudad kon unsaon nga malahutayon ang pagpanalipod niini.

Nakita sa kadumalahan sa water district nga tungod sa nahitabong logging activities ug pagmina sa pipila sa watershed area kaniadto, apan hangtod karon, padayon pa gihapon nga nasinati ang epekto sa pagpanamastamas sa mga mapahimuslanon.

Alayon niini, nagpahigayon ang water district og Watershed Symposium ngadto sa mga residente sa Sitio Iyao sakop sa Barangay Anticala partikular na sa Multi-Purpose Hall sa nasangpit nga dapit.

Sumala ni BCWD Senior Public Relations Officer Ramil S. Barquin, gatosan nga mga residente sa maong dapit ang nitambong.

Dugang ni Barquin, gipasabot ang tanang nitambong kabahin sa kabililhon sa pagpanalipod sa Taguibo Watershed.

Gihimo pang sanglitanan sa water district ang nanglabay nga kalamidad sa ubang mga dapit sa ingon nga dali kining masabtan sa tanang nanambong.

Mahimo matod pang malikayan ang kalamidad ug pagkadaut sa watershed kon ang tanan magpakabana sa ingon dili madaut ang dapit nga gigikanan sa tubig nga maoy gisaligan pagsuplay og tubig sa mga Butuanon.

“BCWD conducted a Watershed Symposium at the Multi-Purpose Hall, Iyao, Anticala. Attended by Iyao residents and farmers, the Symposium emphasized the importance of protecting the Taguibo Watershed to avoid experiencing similar tragedies that happened in other places as results of exploiting and damaging their watersheds,” mensahe ni Barquin.