Water Solution Dakong Sakripisyo

Ni Alex Mapoy

PROYEKTO. Baynte-kwatro (24) oras nga gigama ang Impounding Weir aron maseguro nga adiser mahuman ang kasamtangang tuig, mahimo kining fully operational.

BUTUAN CITY – Sakripisyo sa pamilyang Lagnada ang pagbubo og P550 milyones nga proyekto sa watershed aron sulbaron ang dugay nang suliran sa suplay sa tubig ning siyudad.

Bisan pa man, wala nila gi-igsapayan nga mobubo sa maong gidak-on nga kantidad sa proyekto sanglit nakita sa pamilyang Lagnada ang hinanaling panginahanglan sa mga konsumidor sa Butuan City Water District (BCWD).

Interes sa tanang konsumidor sa BCWD ang gilantaw sa maong pamilya hinungdan ilang gisudlan ang Public – Private Partnership (PPP) tali sa water district.

Ang gibubo nga P550 milyones alang sa maong proyekto ang gikan sa ilang kaugalingong panudlanan hinungdan ang goberno wala nakagasto ni isa ka sentimo para sa katumanan sa maong proyekto.

Sa higayon nga mahuman kini, tanang Butuanon ang mabulahan niini.

Taliwala nga gibabagan ang maong proyekto, apan, gipadayon ang pagtukod og Impounding Weir sa Sitio Iyao, Barangay Anticala human nakahupot og saktong papel sanglit nibati na sila og kaluoy sa katawhan nga mawad-an og suplay sa tubig panahon sa ting-ulan.

Makonsidera usab ang maong proyekto nga pagpaambit sa nahisgotang pamilya sa mga grasya nga naangkon human nagmalamboon ang negosyong gitukod dinhe sa siyudad.

Mas gipalabi nila ang maong proyekto isip tabang sa lokal nga goberno ug sa mga Butuanon sanglit alang sa pamilya, kinsa man diay ang magtinabangay kondi ang magsilingan ra usab.