Watershed Angay Ampingan ug Panalipdan – Fortun

Ni Alex Mapoy

Agusan del Norte 1^st District Cong. Lawrence Fortun

BUTUAN CITY – Pinaka-epektibo pa gihapong solusyon sa suliran sa tubig sa dakbayan sa Butuan mao ang pag-amping ug pagpanalipod sa watershed.

Sumala ni Agusan del Norte 1^st District Cong. Lawrence Fortun, bisan unsa pang matang sa pasilidad ang ibutang sa watershed area kon nagusbat matod pa ang tinubdan sa tubig, ang maong mga pasilidad, makonsidera pa gihapon nga walay pulos ug masayang lamang.

Ang Public – Private Partnership (PPP) tali sa Butuan City Water District (BCWD) ug sa pamilyang Lagnada pinaagi ni Engr. Ronnie Vicente “Ronnie Vic” Lagnada nga magmuntar og P550 milyones nga kantidad sa proyekto, giila ni Cong. Fortun nga malungtarong solusyon sa isyu sa tubig ning siyudad, apan, kawang lamang kini kon guba ang tinubdan sa tubig.

Panawagan ni Cong. Fortun, angayan nga ipatuman sa lokal nga panggamhanan ang gipanday niya niadto ang Butuan City Watershed Code nga maoy naghatag kagahom pagtukod sa Butuan City Management Council.

Sa maong konseho, mas matutukan matod pa, pag-ayo ang pagpanalipod ug pag-amping sa watershed batok sa mga grupo nga gustong mo guba sa tinubdan sa tubig.

Kwestyon lamang sa magbabalaud, nganong wala kini napatuman hangtod karon?

“Isyu ang tubig dinhe sa atong dakbayan. Batikos sa Butuan City Water District tungod sa issue sa insufficiency. Dunay project nga gipangulohan ni Engr. Lagnada diha to address that as a long term solution for sufficient water supply. But, mga kaigsuonan, para kanako, ultimately, the real long term solution to this is the source. Ang ato gyud nga watershed ang atong ampingan, panalipdan, kay bisan unsa pa nga pasilidad nga imong ibutang dinha, kon ang atong watershed nagusbat na, wa gyud tay kaabtan pag-abot sa panahon,” pagtin-aw ni Cong. Fortun atol sa pormal nga deklarasyon sa Bando Lawig diha sa Big Daddy Convention Hall nga nahimutang sa dalang J.C Aquino ning siyudad.