Personahe Gipa-alerto Batok El Nino

Ni Alex Mapoy

BUTUAN CITY – Daling gipalihok sa rehiyonal nga buhatan sa Department of Environment and Natural Resources (DENR) Caraga ang tanang counterpart sa lima ka mga probensya batok sa posibleng epekto sa El Nino Phenomenon ning rehiyon.

Katuyoan niini nga dili mangamatay ang tinanom niining mga semilya sa kahoy ilawom sa National Greening Program (NGP) sama sa mangrove ug daghan pang uban.

Una nang gitagna sa Pagasa nga ning bulan sa Oktobre, masinatian sa mga Caraganons ang epekto sa huwaw.

Sumala ni DENR Caraga Regional Director Nonito M. Tamayo, tungod sa epekto sa huwaw, lauman ang rehiyon nga makasinati sa hinay nga pag-ulan hinungdan nga angayang mo lihok ang tanang kadagkoang opisyal sa ingon mabatokan ang epekto niini.

Alayon niini, daling nipaabot si OIC, PENRO Roberto Oliveros ngadto sa director nga gipa-alerto na ang tanang bag-o nga na hire nga forest rangers ug ang mga naglangkob sa Bantay Gubat task force ilawom sa iyang hurisdiksyon aron magpahigayon og pagpatrolya sa malikayan ang posibleng pag-ulbo sa kalayo sa kalasangan labi na sa gitawag nga NGP plantation.

Kasagaran nga mo ulbo ang kalayo mao kadtong na gikan sa tapok sa mga laya nga dahon ingon man kakognan ug angay usab nga motabang ang komunidad aron malikayan ang posibleng pag-ulbo sa kakahuyan.

Subay niini, nanghinaut ang opisyal nga ang tanang counterpart sa ahensya mohimo sa tahas nga gisangon kanila aron walay mga tinanom nga kahoy ang madamyos.