AgNor Ideklarang Conflict Manageable – Col. Macario

Ni Alex Mapoy

401st Brigade Philippine Army Commander Col. Alexander Macario naglingkod uban ang pipila ka media personalities. Photo by Alex Mapoy

PROSPERIDAD, Agusan del Sur – Gitakdang ideklara sa Armadong Kusog sa Pilipinas ang probensya sa Agusan del Norte nga conflict manageable sulod ning bulana.

Sumala ni 401st Brigade Philippine Army Commander Col. Alexander Macario, andam na ang probensya alang sa kalamboan sanglit kontrolado na ang armadong grupo sa probensya sama sa New Peoples Army (NPA).

Dugang ni Col. Macario, malinawon na ang probensya ug mahimo na kining sudlan sa nagkadaiyang imbestor.

Andam na matod pa ang probensya sa kalamboan hinungdan nga mahimo na kining sudlan sa mga imbestor nga magdala og kalamboan sa pamuyo sa mga Agusanon.

Gipasabot sa kumander, kon malinawon ang isa ka lugar, maengganyo ang mga imbestor nga mo bubo og puhonan, apan kon gubot kini, ang maong dili magmalamboon sanglit mahadlok man kining magmuntar og negosyo.

Nanghinaut na lamang ang opisyal nga sa pagsulod sa mga imbestor, daghang Agusanon ang mahimong malamboon labi na sa pamuyo.

Sa tabang unya sa mga imbestor, daghang mga anak sa kabus ang makapadayon sa pagtungha sanglit ang ginikanan sa kabataan ang duna naman unya kini igong panginabuhian.

Nanawagan na lamang usab ang opisyal sa katawhan nga ipadayon ang pagsuporta sa tanang programa sa goberno sanglit alang ra man kini sa kalamboan sa kinabag-an.