Philippine Eagle Nasigpatan sa Sibagat

Ni Alex Mapoy

Lapad nga lasang sa Sibagat Agusan del Sur gituohan nga gipuy-an sa Philippine Eagle. Photo courtesy of Eric Gallego

SIBAGAT, Agusan del Sur – Duha ka Philippine Eagles ang gituohan nga nagpuyo sa lapad nga kalasangan sa lungsod sa Sibagat sakop sa probensya sa Agusan del Sur.

Sumala ni Communication and Development Office Supervisor Eric Gallego sa Department of Environment and Natural Resources (DENR) Caraga, nag-asoy kanila ang mga lumad nga namuyo sa lapad nga kalasangan sa maong lungsod nga dunay mga higayon nga ilang makit-an nga maglupad-lupad ibabaw sa kalasangan ang agila.

Dugang ni Gallego, ang pagduda sa mga lumad ang posible nga tinuod tungod sa kabaga sa lasang sa maong lungsod.

Makita sa lasang ang dagko nga mga punoan sa kahoy sama sa lauan diin natural kining nitubo sa maong dapit.

“It's wonderful to find this giant lauan tree still exist in the natural forests of Sibagat, Agusan del Sur where a couple of Philippine Eagles are often noticed by the lumads community to be hovering from the skies and the thick forests.”

Una nang nanawagan si DENR 13 Regional Director Nonie M. Tamayo sa katawhang Caraganon nga kon makita ang presensiya sa mga agila sa lasang, dili kini hilabtan, hinono-a, mas maayo kining panalipdan.