Lianga Masscare Gikondina, Hustisya Gipanawagan

Ni Alex Mapoy

Nanginlabot na ang Communist Party of the Philippines (CPP) sa gihimo sa armadong grupo nga  Magahat/Bagani Force pagpatay sa pipila ka mga sibilyan sa lungsod sa Lianga ug kasikbit nga mga lungsod sakop sa probensya sa Surigao del Sur.

BUTUAN CITY – Nanginlabot na ang Communist Party of the Philippines (CPP) pinaagi sa pagpasibaw sa panawagan ngadto sa administrasyong Aquino nga hatagan sa hinanaling hustisya ang mga biktima sa niluog nga binuhatan sa armadong grupo nga naglihok sa lungsod sa Lianga ug kasikbit nga mga lungsod sakop sa probensya sa Surigao del Sur.

Wala gikahimuot sa partidong komunista ang gihimong kremin sa armadong grupo partikular na ang Magahat/Bagani Force nga matod pa gi-organisa sa tropa sa kagamhanan.

Ang gihimo sa armadong grupo ang mahugtanon nga gikondina sa partido dungan sa panghimaraut sa nagmugna niini.

Gibansagan sa komunistang grupo nga usa ka masaker ang gihimo sa Magahat/Bagani Force diin gipatay ang mga biktima bisan walay ikasukol.

Nanawagan usab ang CPP sa armadong puwersa sa rebolusyon nga ikondina ang dili makatawhanong gihimo sa armadong grupo dungan sa pag-awhag nga patubagon ang mga nihimo sa kremin pinaagi sa pagsilot kanila.

“Just punishment must be meted out against the perpetrators of the Lianga massacre and other crimes against the people.”

Hugot usab nga gipanawagan sa partido nga i-atras ang tropa sa militar nga naglihok duol sa komunidad sa mga lumad aron makabaton na kini sa hapsay ug malinawon nga pamuyo.