Karapatan Caraga Gikasohan

Ni Alex Mapoy

BUTUAN CITY – Hingpit nang nadawat sa Karapatan Caraga ang kopya sa kaso nga giduso sa pipila ka mga operatiba kinsa nakulatahan atol sa paglubong sa duha ka biktima sa Lianga massacre.

Kasong serious physical injury ug robbery ang gisang-at nga kaso sa tulo ka mga sakop sa 401st Infantry Brigade sa Philippine Army batok na kang Karapatan Caraga Secretary General Eliza Pangilinan.

Gitumbok ni Pangilinan nga ang nisang-at og kaso kaniya mao si Sgt. Lomor Ramoso, ug laing duha ka mga kaubanan. 

Sumala ni Pangilinan, pulos lamang tinumo-tumo ang kaso nga gipasaka sa mga reklamante batok kaniya ngadto sa piskalya sa lungsod sa Lianga.

Dugang ni Pangilinan, dili pulis ang ni-rescue sa tulo ka mga reklamante dihang gikulata sa mga tawo ang mga nahisgotan kondi siya mismo ang nikuha kanila ug gidala ngadto sa Lianga Municipal Police Station aron malikay sa masuk-anong katawhan.

"It wasn't the police of Lianga who rescued the three 401st IBde operatives, it was me who rescued them because they might get seriously beaten up by those angry people. I never even touch them and never get anything from them," pahayag ni Pangilinan

Subay niini, andam si Pangilinan nga atubangon ang mga kaso nga gipasaka batok kaniya dungan sa pagklaro nga usa ka desperadong lakang ang gihimo sa militar aron i-demoralize ang ilang grupo, i-harrass, ug hadlokon lakip ang iyang grupo.

“It is completely malicious and a desperate move by the military to demoralize, harass and threaten her and her group,” dugang sa naulahi.

Hisayran nga adtong Septembre 13 atol sa gihimo nga burial program alang sa mga biktima sa masaker nga sila Dionel Campos ug Datu Juvello Samarca, nasakpan ang mga reklamante sa nitambong nga katawhan nga gipanid-an ang ilang lihok, nagpunay og text, ug sekreto nga nikuha og hulagway sa mga tawo nga nitambong sa naasoy’ng programa hinungdan sila gikulata.

Atol matod pa sa gihimong interogasyon sa imbestigador sa pulis, nakuhan ang isa sa tulo ka mga operatiba og isa ka punto 45 nga pistola nga kargado sa mga buhing bala, apan human gisukit-sukit, gibuhian ra usab ang mga nahisgotan.