Leaflets Batok Druga Gipanghatag

Ni Alex Mapoy

Gibisita ni PO2 Ma. Morina P. Fernandez ang JACES ug nanghatag og leaflets ngadto sa mga estudyante. Photo courtesy of Jabonga MPS

JABONGA, Agusan del Norte – Wala lamang naka-pokus ang kapulisan sa rehiyon sa Caraga paghinlo sa han-ay human pipila ka mga kaubanan ang nagpositibo nga nagamitan og drugas, kondi, padayon kining naningkamot nga magtubo ang kabataan nga ligdong ug layo sa bisan unsang bisyo.

Subay niini, ang kadumalahan sa Jabonga Municipal Police Station naningkamot nga magiyahan ang kabataan sa matarong nga dala ug dili kini mahisulod sa dautang bisyo sa druga.

Kabahin sa lakang mao ang pagpanghatag og leaflets ngadto mga estudyanteng magtutungha diin nakalatid niini ang dautang epekto sa drugas sa kinabuhi sa tawo kon kini magpakabuang.

Sama sa gihimo ni PO2 Ma. Morina P. Fernandez, PCR PNCO sa Jabonga Municipal Police Station nanghatag kini og leaflets taliwala pa man nga gitay-og ang tibuok han-ay sa kontrobersiya human nalambigit ang pipila niini sa druga.

Nalatid sa leaflet ang dautang epekto sa druga diin dauton niini ang panglawas ug labaw sa tanan ang maayong kaugmaon.

Malaumon ang maong pulis nga pinaagi sa gi-apod apod nga leaflets, matabangan ang kabataan nga maagak sa sakto nga dalan.

Dili lamang ang kabataan maoy pokus sa Jabonga MPS kondi ang tibuok katawhan nga nanimuyo sa naasoy’ng lungsod.