Reklamo Batok Employer Nagpadayon

Ni Alex Mapoy

NLRC Caraga Administrative Office V
Robert M. Aying

BUTUAN CITY – Ubay – ubay pa gihapon sa mga trabahante ang makonsidera nga nalapasan sa tawhanon niining katungod human padayong nagdawat ang National Labor Relations Commission (NLRC) Caraga og mga reklamo batok sa gitrabahoang establisyemento o kompanya.

Basi sa datos, nakadawat ang buhatan adtong Agosto og 32 ka mga kaso diin 31 niini ang gikan sa lokal nga pangimpleyo samtang ang isa gikan sa langyaw nga panarbaho.

Sumala ni NLRC Caraga Administrative Office V Robert M. Aying, kutob sa mga kaso nga iduso sa nagkadaiyang reklamante, ila kining dawaton.

Mo lungtad lamang sa unom ka bulan ang pagdungog sa maong reklamo diin langkob niini ang pagahimuong pag-areglo aron dili mo dako ang kaso ug dili na usab mahasol pa ang duha ka habig.

Sa higayon nga dili magkasinabot ang duha ka partido – ang nireklamo ug ang gireklamo, diha na magpagawas og desisyon ang buhatan basi sa sirkumstansiya ug ebidensya nga gipresentar sa matag habig.

Pasalig sa opisyal, tanang kaso nga ilang madawat ang hukman nga patas samtang kadtong habig nga wala nakontento o agrabyado sa desisyon nga ipakanaug sa buhatan, mahimo kining mo apela.