Piniriso Angay Respetohon – VPA President

Ni Alex Mapoy

PPA-DOJ VPAs Butuan President Ma. Linda Alcasid

BUTUAN CITY – Dako ang pagtuo ni Parole and Probation Administration (PPA) Volunteer Probation Aides (VPAs) Butuan President Ma. Linda Alcasid nga bisan napriso ang isa ka tawo, angay pa gihapon kining respetohan.

Ang baruganan ni Alcasid maoy nagtukmod sa nahisgotan kon nganong gaan ang kasingkasing pagtabang ug paghatag serbisyo sa buluntaryong paagi ngadto sa mga nakalapas sa balaud.

“Bisan piniriso na sila, duna gihapon na silay dignidad, butang nga angay respetohon. Bisan unsa na sila ka dautan, kon paminawon lang nimo sila, mo tumaw ang iyang kamaayo,” pamahayag ni Alcasid.

Nakita sa gatosan niini ka mga kaubanan ang dedikasyon, commitment, ug ka mahadlokon sa Dios hinungdan nga si VPA Pres. Alcasid maoy gituboy sa PPA-DOJ VPA Butuan nga mahimong Regional Outstanding VPA dinhe sa rehiyon.

Kon ugaling mapili si Alcasid nga Regional Outstanding VPA sa Caraga, siya maoy magsilbing pambato ning rehiyon alang sa National Outstanding VPA.

Alang sa kabahinan ni Barangay Kagawad Ronald B. Dizon, angayan lamang nga mahimong Regional Outstanding VPA sa Caraga si Alcasid tungod sa dili maihap niining mga kalamposan paghimo sa tahas isip VPA taliwala pa man sa ka bise sa trabaho.

Nadunggan usab ni Kagawad Dizon nga pipila sa kinitaan ni Alcasid gigahin alang sa pagtabang ngadto sa nanginahanglan.

Si Alcasid nahimong membro sa Prison Ministry sa Episcopal Commission on Prison Pastoral Care sa Diocese of Butuan.

Isip membro, gidestino kini sa Provincial ug City Jail dis-a gipriso ang gatosan ka mga indibidwal nga nalambigit sa nagkadaiyang kremin sama sa druga.

Napasayon sa nauwahi ang pagtabang sa mga piniriso ang nakat-onan isip membro kaniadto sa Catholic Charismatic Renewal Movement (CCRM).

Mas nilapad ang boluntaryo niining serbisyo human nahimong aktibo sa PPA-DOJ isip Volunteer Probation Aide pinaagi sa pagtabang sa mga kliyente sa buhatan pinaagi sa pagsilbing lecturer, resource person, ug pagsuporta sa livelihood program.

Isip president, natabangan sa nahisgotan ang mga nalambigit sa drug-related cases diin isa niini ang gihatagan og panginabuhian pinaagi sa paghatag og trabaho; kliyente nga nalambigit sa pagpangawat diin natabangan nga makabaton og kaugalingong balay sa Barangay Doongan ning siyudad; pagtabang sa kliyente nga biktima sa sunog sa Barangay Obrero partikular na sa Slaughter area; ug daghan pang uban. 

Ang tanang nahimo ni VPA Pres. Alcasid nahitabo ubos sa superbisyon ni PPA-DOJ Butuan Chief Probation and Parole Officer Cristina R. Argente uban sa tabang nila PPO II Alex Castaños, ug PPO II Ester Samano.