P7M Gidawat sa AgNor

Ni Alex Mapoy

Gidawat ni Gov. Ma. Angelica Rosedell Amante – Matba ang premyo ingon man certificate isip isa sa mga LGU Awardees sa SGLG 2015. Photo courtesy of Sonny T. Montilla

AGUSAN DEL NORTE – Pormal nga gidawat sa probensyal nga kagamhanan ang cheque balor P7 milyones gikan sa Department of Interior and Local Government (DILG) Caraga sa nakalabay’ng semana.

Nagsilbing premyo ang maong kantidad sa probensya human napili ang Agusan del Norte Government nga isa sa mga Local Government Unit (LGU) awardees sa tibuok rehiyon subay sa gipasiugdahan nga Seal of Good Local Governance (SGLG) 2015.

Sumala ni Community Affairs Officer IV Edgar M. Palarca, Jr., nilawas nga gidawat ni Governor Maria Angelica Rosedell M. Amante – Matba ang nahisgotang cheque ingon man certificate.

Dugang ni Palarca, gikalipay pag-ayo sa probensyal nga kagamhanan human na lakip sa 5 ka mga LGU awardees sa gipasiugdahan sa DILG Caraga nga SGLG 2015.

Gitin-aw sa opisyal, ang maong pasidungog magsilbing hagit sa probensyal nga kagamhanan nga mapadayon ang maayong kadumalahan.

Ang SGLG 2015 gipasiugdahan sa DILG Caraga aron mahatagan og pasidungog kadtong mga LGUs nga nihimo sa ilang “the best performance” sa pangatungdanan.

Magsilbi usab kini nga inspirasyon sa tanang LGUs ning rehiyon nga mo himo sa ilang responsibilidad pinaagi sa paghatag sa de kalidad nga serbisyo ngadto sa katawhan.

Ang premyo nga nadawat sa probensya ang idapat ra usab kini sa proyekto aron mapahimuslan sa tanang Agusanon.