VPA Subleng Gipasabot

Ni Alex Mapoy

Mga Volunteer Probation Aides (VPAs) sa PPA-DOJ Butuan kinsa dunay kasingkasing nga mo serbisyo ngadto sa mga kliyente sa buhatan. Photo by Alex Mapoy

BUTUAN CITY – Gipasabot sa Parole and Probation Administration (PPA) Butuan ang tanang Volunteer Probation Aides (VPAs) kabahin sa kalainan sa probation ug parole atol sa gipahigayong tigom sa PPA-DOJ Butuan, Hall of Justice, Brgy. Libertad ning siyudad.

Sumala ni PPO II Ester Samano, kon i-grant ang aplikasyon sa piniriso nga mahimong probationer, ang nahibiling tuig nga angay niini serbisyohan, pananglit tulo ka tuig, ang i-suspende.

Ang probationer, ipailawom sa superbisyon sa PPA – DOJ ug magsunod sa gikantar nga mga kondisyones.

Sa higayon nga makasala kini, bisan kulang na lang og isa ka bulan mahuman ang probationary period, puwede nga i-rebuke ang maong prebilihiyo ug serbisyohan ang nahibiling tulo ka tuig nga sentensya.

Dugang ni Samano, kon i-grant ang aplikasyon sa isa ka binilanggo nga mahimong parolee, ang nahibiling tuig nga sentensya nga angayan niining serbisyohan ang masuspende.

Kon lima na lamang ka bulan ang kulang para makompleto ang tulo ka tuig nga pagpailawom sa superbisyon sa PPA-DOJ, nakasala ang hingtungdan, mahimong i-rebuke ang prebilihiyo, apan ang serbisyohan sa parolee ngadto sa prisohan mao na lamang ang 5 ka bulan nga kulang.

Gihimo kini sa opisyal sa ingon nga malab-as pagbalik sa hunahuna sa mga VPAs ang kalainan sa probation ug parole.