Bag Distribution Gipanghinaut

Ni Alex Mapoy

Mapasalamaton ang mga estudyante nga nakadawat sa libre nga bag dungan sa panghinaut nga ipadayon ang maong programa aron matag tuig, duna silay masudlan sa gamit pang-eskwela. Photo courtesy of Judy C. Amante

CABADBARAN CITY – Nanghinaut ang mga benepisyaryong estudyante nga magpadayon ang pagpanghatag sa libreng bag sa probensya ngadto sa mga kabus nga magtutungha aron dili mabasa ang ilang gamit pang-eskwela panahon sa ting-ulan.

Hisayran nga laing gatosan ka mga bag ang gi-apud-apod sa probensyal nga kagamhanan ngadto sa mga magtutungha sa Lusong Elementary School nga nahimutang sa Sitio Lusong Barangay Puting Bato, ning siyudad.

Nasuta nga dili kini ang unang higayon nga gihimo sa probensyal nga kagamhanan kondi adiser niini, nanghatag usab og school bags si Governor Maria Angelica Rosedell Amante Matba ngadto sa mga magtutungha sa Barangay Simbalan sakop sa lungsod sa Buenavista, Agusan del Norte.

Ang pagtunol og mga school bags sa Sitio Lusong, gipangunahan gihapon kini ni Gov. Matba kinsa personal nga mitumol sa mga bag ngadto sa mga benepisyaryong estudyante.

Lauman nga sa sunod nga mga adlaw, laing gatosan o liboan ka mga estudyante ang mahatagan sa libreng bag ubos sa kadumalahan sa gobernadora.

Gihimo kini uban sa pag-abag sa Provincial Social Welfare Population ug Nutrition Services Office (PSWPNSO) sa pagpanguna ni Daisybel O. Demavivas.

Pipila ka mga estudyante labi na sa mga nanimuyo sa hilit nga lugar, ang gamit pang-eskwela sama sa libro, notebook, ug daghan pang uban ang isulod lamang sa netbag o kaha sako nga giporma og bag hinungdan nga panahon sa ting-ulan, mangabasa ug mangadaut.

Netbag ug sako bag lamang ang maabot sa mga ginikanan tungod sa kawalay igong salapi nga ikapalit sa klaro nga bag nga kon panahon sa ting-ulan, dili mabasa.