Sundalo Nabihag sa NPA

Ni Alex Mapoy

AGUSAN DEL SUR – Gikomperma sa kadagkoan sa New Peoples Army (NPA) nga ilang grupo maoy nidagit sa isa ka membro sa militar diha sa Km.16, Brgy. Policarpo, lungsod sa San Luis adtong Sabado, alas-10:45 sa buntag.

Sa sulat ni Ka Allan Juanito, tigpamaba sa North Central Mindanao Regional Command – New Peoples Army, giila ang gibihag nga usa ka Sgt. Adriano Delapeña Bengil, 34 anyos, minyo, dunay duha ka buok anak, residente sa Brgy. Lapasan, sakop sa dakbayan sa Cagayan de Oro.

Nadakpan ug nabihag sa mga rebelde ang nahisgotan atol sa gihimong check-point sa isa ka yunit sa NPA ubos sa Western Agusan Norte-Agusan Sur (NPA WANAS) Sub-regional Command.

Dugang ni Ka Juanito, si Bengil maoy nagsilbing lider sa Peace and Development Team (PDT) ubos sa 26th Infantry Battalion, Philippine Army.

Pokus matod pa sa grupo ni Bengil mao ang Community Organizing for Peace and Development (COPD) sa Barangay Mahagsay, sakop sa maong lungsod.

Nasayran nga padulong unta si Bengil sa sentrong bahin sa lungsod sa San Luis aron magpadala og kwarta ngadto sa iyang pamilya, apan, nadakpan kini sa isa ka yunit sa mga rebelde.

Gipaneguro sa nahisgotan nga ang ilang dinakpan anaa sa luwas nga kahimtang sa custodial unit sa NPA isip prisoner of war (POW).

Pasalig sa nauwahi ngadto sa kabanay sa dinakpan nga ihatag nila ang saktong pag-atiman subay sa nakalatid sa balaud sa gubat partikular na sa Comprehensive Agreement on the Respect for Human Rights and International Humanitarian Law (CARHRIHL).

Sa pagkutlo ning balita, wala gipahayag ni Ka Juanito kon kanus-a buhian ang dinakpan.