Butuan Faith Teachers Gipasidunggan

Ni Alex Mapoy

PASIDUNGOG. Gihatagan sa mga estudyante sa Butuan Faith Christian School ang ilang mga magtutudlo og bulak ingon man gasa isip pagpakita sa ilang paghatag pasidungog ug pagpasalamat sa mapadayonon nga pagtudlo kanila. Photo by Alex Mapoy. 

BUTUAN CITY – Gipasidunggan sa kabataang Filipino Chinese ang ilang magtutudlo sa Butuan Faith Christian School kinsa nahimong instrumento nga magdako sila nga hitsas sa saktong edukasyon ug magdako nga mahadlokon sa Dios.

Sukli sa bayanihong buhat, gipasidunggan ug gigasahan sa kabataang Filipino Chinese ang mga magtutudlo isip pagpadayag sa kinasingkasing niining pagpasalamat atol sa pagselebrar sa Teachers Day.

Malipayon nga gisaysay ni Chinese Department Head Lan Jianmin ang komento sa pipila ka mga ginikanan nga mas gipili nila ang pagpatungha sa ilang mga anak sa Butuan Faith Christian School tungod sa talagsaon niining paagi sa pagtudlo diin gi-usa pagtudlo ngadto sa kabataan ang edukasyon ug relihiyosong pagtulun-an.

Kamatuoran niana, nisaka sa 21 porsyento (21%) ang populasyon sa tunghaan butang nga ilang gikalipay.

Gawas niana, gitudloan usab ang ilang mga estudyante kon unsaon pag-estorya sa pinulongang Mandarin sa ingon dili mawala ang maong kultura.

“We combine the Chinese virtue and culture way of teaching. So, it is our specialty compare to other school. You know, Chinese language is limited. Some parents told me that I like Chinese school the way of teaching rather than public school,” tipik sa pamahayag ni Jianmin.

Si Jianmin, usa ka magtutudlo sa China kinsa gikuha sa Filipino Chinese Education Research Center aron ipadayon ang pagtudlo sa kulturang Intsik sa kabataang Filipino Chinese nga ania nanimuyo sa Pilipinas sama sa dakbayan sa Butuan.

Gidumala ni Jianmin ang Chinese Department samtang ang tibuok eskwelahan, gidumala ni School Principal Rev. Benjamin Guimary.

Ang Butuan Faith Christian School maoy nag-inusara nga Chinese Christian School nga nagtunhay ning siyudad.