Media Practitioner Naulaw

Ni Alex Mapoy

NAULAW. Gipangunayan ni Nikolai, isa ka langyaw’ng turista ang paggiya sa mga media practitioner nga taga – Caraga kon asa nahimutang ang Cloud 9 sa lungsod sa General Luna, Siargao Island. Photo by Alex Mapoy

GENERAL LUNA, Surigao del Norte – Nibati og kaulaw ang pipila ka media practitioner sa rehiyon sa Caraga dihang isa ka langyaw nga tourist guide maoy nigiya pagtultol ngadto sa pipila ka tourist spots sa lungsod sa General Luna atol sa pagbisita human wala nakatuod.

Sa pagbisita sa mga media practitioners ingon man information officers sa nagkadaiyang ahensya sa goberno nga na gikan sa rehiyon sa Davao ug Caraga sa pipila ka tourist spots sa lungsod sa General Luna sama sa Cloud 9, isa ka langyaw nga tourist guide maoy nangunay paggiya sa grupo.

Gi-orient pa ni Nikolai ang grupo kabahin sa background sa lungsod labi na ang mga nindot nga talan-awon nga gidagsa sa nagkadaiyang rasa nga turista.

Nibati og kaulaw ang pipila ka media practitioner nga taga – Caraga kinsa bag-ohay pa lamang nakaabot sa maong lungsod human nabali ang kahimtang diin imbes ang mga langyaw’ng turista maoy giyahan asa dapit nahimutang ang mga tourist spots, ang grupo naman hinuon maoy gigiyahan human nahimong langyaw sa kaugalingong rehiyon.

Si Garry Jamboy Cruz, reporter sa DXJM Butuan, niangkon nga nabali na ang kahimtang, imbes siya isip Caraganon maoy mo giya sa mga langyaw’ng turista, apil naman hinuon siya ang gitultolan sa maong langyaw.

Mismo si Cruz niangkon nga bag-ohay lamang siya nakaabot sa maong lungsod hinungdan nga wala siya katuod kon asa nahimutang ang nindot nga talan-awon sa maong lungsod sama sa Cloud 9.

“Uy, nabali na gani ni. Imbes kita ang maggiya sa mga langyaw’ng turista, kita na hinuon ang gi-orient sa langyaw,” tipik sa pamahayag ni Cruz.

Subay niini, gi-awhag sa nahisgotan ang tanang Caraganon nga mo bisita sa nagkadaiyang tourist spots ning rehiyon aron dili kini mahimong langyaw sa kaugalingong rehiyon.