Task Force Batok Kalamidad Ipamugna

Ni Alex Mapoy

OCD Caraga Regional Director Manuel 

Luis M. Ochotorena

DEL CARMEN, Surigao del Norte – Angayan nga magmugna og task force ang matag kagamhanang lokal isip kabahin sa mitigating measure sa bisan unsang porma sa kalamidad.

Sumala ni Office of the Civil Defense (OCD) Caraga Dir. Manuel Luis M. Ochotorena, mas maayo nga dunay mamugna nga mga task force ang matag Local Government Unit (LGU) aron pag-abot sa kalamidad, mas malikayan nga dunay kinabuhing makalas, maminusan ang damyos, ug mas paspas ang pagtunol sa gikinahanglang tabang ngadto sa apektadong residente.

Dugang ni Dir Ochotorena, dili na bag-o pa sa matag LGU ang bisan unsang porma sa kalamidad hinungdan nga mas maayong magmugna kini og grupo aron awtomatiko nga matabangan ang maapektohang pamilya.

Gihimong ehemplo sa direktor, kon ang isa ka dapit bahaonon panahon sa ting-ulan, angayan nga kasado nang daan ang lakang himoon alang sa maong kalamidad.

Nakita sa opisyal nga matag LGU, walay namugna nga task force alang sa baha, landslide, o unsa mang porma sa kalamidad hinungdan nga iya kining gipursige pagmugna.

Ang maong estratihiya namugna human nasinatian sa direktor ang nahitabo sa dakbayan sa Tacloban dihang gihapak sa bagyong Yolanda nga naglibog ang mga biktima kon kinsay duolan sanglit mismo ang LGU, wala kasayod unsay buhaton.

Lantaw sa opisyal, kon mahimo lamang kini sa matag LGU bisan sa kabaranggayan, mas paspas unya ang pagtunol sa serbisyo ngadto sa mga maapektohan sanglit dili naman kini maghulat pa sa hingtungdang ahensya nga makaresponde.