Panginabuhian sa Mag-uuma Nibentaha

Ni Alex Mapoy

Nibentaha ang pamuyo sa mga mag-uuma tungod sa implementasyon sa Support to Emergency and Livelihood Assistance Project Phase II (SELAP2). Photo courtesy of DA Caraga PRO II Aurelius P. Arais

LANUZA, Surigao del Sur – Sangko sa langit ang pagpasalamat sa isa ka mag-uuma sa Surigao del Sur sa Department of Agriculture (DA) Caraga human nibentaha ang panginabuhian dihang lakip ang ilang lugar nga nabuhatan sa konkretong kalsada.

Kabahin ang nahisgotang kalsada sa 12 ka mga proyektong farm-to-market road (FMR) kansa nagtumong nga mapasayon ang pagtumod sa abot sa kaumahan ngadto sa merkado.

Buhing saksi si Romueld Borromeo, purok president sa Sitio Ipil, Agsam, Lanuza sakop ning probensya nga tungod sa konkretong FMR, wala na sila maglisod pagdala sa ilang produkto ngadto sa sentrong bahin sa ilang lungsod ug makadali-dali na kini pagtugbong sa lungsod sanglit duna namay tarong nga kalsada ug mas niminus ang gastos pagtumod sa abot.

Sumala ni Public Relations Officer II Aurelius P. Arais, ang 12 ka mga FMRs nga gi-implementar sa nagkadaiyang bahin ning rehiyon maoy bunga sa pagpatuman sa ahensya sa Support to Emergency and Livelihood Assistance Project Phase II (SELAP2).

Ang SELAP2 gisugdan pagpatuman adtong 2012 ug mahuman kutob ning tuiga diin tanang FMR, pulos konkreto.

Sukad gipatuman ang SELAP2, mokabat sa 8.585 kilometros nga konkretong kalsada ang nagama nga nagkantidad og P48.5 milyones.

Dugang ni Arais, sukad napatuman ang SELAP2, duha na lamang ka mga FMRs ang tiwason ning tuiga nga nahimutang sa probensya sa Dinagat Islands partikular na sa mga lungsod sa Dinagat ug Cagdianao.

Ang ubang FMRs nahimutang sa probensya sa Agusan del Norte partikular na sa mga lungsod sa Buenavista, Magallanes, ug Santiago; mga lungsod sa Surigao del Norte labi na sa San Francisco ug Malimono; mga lungsod sa Surigao del Sur partikular na sa San Miguel, Lanuza ug Cagwait.

Gipasabot ni SELAP2 Finance and Livelihood focal person Jessica Da-an dihang nahinabi ni Arais, tanang FMR ang gi-konkreto sanglit makasugakod kini sa pag-usab sa klima, sukwahi sa grabadong kalsada.

Mismo matod pa si Agriculture Secretary Proceso Alcala ang nagtin-aw nga dili makasugakod ang grabadong kalsada sa epekto sa pag-usab usab sa klima hinungdan nga tanang FMR ang gikonkreto.

Nasayran nga ang SELAP isa ka special project sa nasudnong kagamhanan nga gisalig sa ahensya kansang pundo nga gigamit ang inutang.

Gituyo kini pagdisenyo aron matubag ang panginahanglan sa mga kabus nga sektor sa katilingban sa mga dapit sa Mindanao partikular na sa Rehiyon IX, XI, ug Caraga.