Thursday, September 10, 2015

RED Tamayo, Nakadawat og Death Threat

Ni Alex Mapoy
DENR Caraga Regional Director Nonito Tamayo

BUTUAN CITY – Wala matarog ang kadumalahan sa Department of Environment and Natural Resources (DENR) Caraga pag-asdang sa kampanya sa ahensya bisan pa man og nakadawat kini og hulga sa kinabuhi.

Sumala ni DENR Caraga Regional Director Nonito Tamayo, pursigido ang iyang kadumalahan nga ipadayon ang kampanya batok illegal logging ning rehiyon sanglit igo lang gihimo ang iyang trabaho nga gisangon sa goberno kanila.

Dugang ni RED Tamayo, paninguhaon sa iyang liderato nga adiser mahuman ang kasamtangang tuig, mawagtang na sa hingpit ang illegal logging activities ning rehiyon.

Wala usab gidetalye sa opisyal kon kinsa nga grupo ang nanghulga kaniya, grupo ba sa rebeldeng New Peoples Army (NPA) o kaha grupo sa mga illegal loggers nga naligsan sa kampanya ug kanus-a usab kini nadawat.

Bisan pa man, nanawagan ang opisyal sa publiko nga suportahan ang kampanya sa ahensya aron hingpit nang mawagtang ang iligal nga pagpamutol sa kahoy ning rehiyon labi na nga ang epekto sa binuhatan sa mga loggers, ang tanang katawhan maoy mag-antos.

Una nang gipaabot sa direktor ngadto sa tanang nanambong sa Interfaith Dialogue on Climate Change sa nakalabay’ng semana nga gumikan sa ilang paningkamot, nihinay ang iligal nga kalihokan sa pagpamutol og kahoy sa kalasangan butang nga ilang gikalipay human nibunga ang ilang paningkamot.

No comments:

Post a Comment