PPP Gisusi sa Makabayan Bloc

Ni Alex Mapoy

Nanginlabot na ang Makabayan Bloc sa Caraga sa PPP Bulk Water Project diin nilawas kining nisusi sa Sitio Iyao, Brgy. Anticala ning siyudad sa Butuan. Photo by Alex Mapoy

BUTUAN CITY – Nilawas nga gibisita sa Makabayan bloc sa Caraga ang nagpadayon nga PPP Bulk Water Project nga nahimutang sa Sitio Iyao, Brgy. Anticala ning siyudad sa Butuan.

Ang Makabayan bloc naglangkob kini sa mga progresibong grupo ning rehiyon kinsa naila nga walay hunong luyo sa hulga pag-asdang sa kaayohan sa katawhan ug pagkondina sa mga hiwi nga binuhatan.

Adiser nidalikyat ang grupo sa nahisgotang dapit, gipailawom una ang grupo sa kapin duha ka oras nga briefing kabahin sa operisyon sa water district, programang gipatuman sa watershed area, ug sa PPP Bulk Water Project.

Sumala ni Butuan City Water District (BCWD) General Manager Engr. Anselmo Sang Tian, ang PPP Bulk Water Project mokabat kini sa upat ka ektarya nga luna.

Dugang ni GM Sang Tian, 24 oras nga gitrabaho sa mga trabahanteng Igorot ang maong proyekto diin gipahiluna pag-ayo ang mga dagkong bato aron maseguro nga pulido ang pagkahimo niini.

Gitin-aw ni GM Sang Tian, kadtong mga bato nga dili mo haum, gitiltilan sa nahisgotang mga trabahante aron lamang masibo sa pagaplastaran.

Lakip usab nga gibisita sa grupo ang Infiltration Gallery nga nahimutang sa Brgy. Taguibo sakop ning siyudad ug didto gipasabot kon unsang klaseha sa tubig ang gi-suplay sa water district sa tibuok siyudad.

Ang maong kalihokan kabahin kini sa paningkamot sa water district sa pagpadayon pagpalambo sa serbisyong gitunol ngadto sa katawhang Butuanon ug isip kabahin sa pagsunod sa International Organization for Standardization (ISO) human nahimo ang buhatan nga ISO 9001:2008 certified.