Pagpasagad sa DepEd Gikondina

Ni Alex Mapoy

Gipukpok ug gilangkat sa mga raliyesta ang gate sa DepEd Caraga aron ipakita ang tumang kasuko human wala nagpakabana sa binaboy nga buhat sa armadong grupo ngadto sa ALCADEV School sa lungsod sa Lianga Surigao del Sur. Photo by Angel Lyn F. Gaviola

BUTUAN CITY – Gikondina sa militanteng grupo ang Department of Education (DepEd) Caraga tungod sa kawalay aksyon nga gihimo kabahin sa dugoong hitabo sa Alternative Learning Center for Agricultural and Livelihood Development (ALCADEV) sa Km. 16, Brgy. Diatagon, Lianga, Surigao del Sur adtong ka adlawon sa Septembre 1 sa kasamtangang tuig.

Sumala ni Karapatan Caraga Secretary General Eliza Pangilinan, bisan pa man sa kamatuoran nga wala gipadagan sa goberno ang ALCADEV, apan, angayan usab unta mo himo og lakang ang ahensya sa DepEd aron mapanalipdan ang eskwelahan sa mga estudyanteng lumad.

Dugang ni Pangilinan, angayan pa man gani nga magpasalamat ang DepEd sa ALCADEV sanglit nitabang kini pag-eduka sa kabataang lumad, apan ang maong tinguha, wala kini gihatagan og importansiya sa ahensya.

“Hatagan unta og pagtagad. Unsay ikatabang sa DepEd aron masalbar ang eskwelahan sa mga lumad. Dili matod pa mo tabang ang DepEd kay dili run by government,” tipik sa pamahayag ni Pangilinan.

Hisayran nga bunga sa gihimong pagpanghasi sa armadong grupo ngadto sa komunidad sa mga lumad sa Surigao del Sur, dul-an isa ka libo ka mga estudyanteng lumad ang na apektohan lakip ang mga magtutudlo, ug liboan usab ang namakwit tungod sa hulga sa ilang seguridad.

Dili lang ang ALCADEV ang biktima sa pagpang-harrass kondi lakip na ang Tribal Filipino Program of Surigao del Sur (TRIFPSS).

Subay sa hitabo, halos 80 ka mga raliyesta ang nisulong sa rehiyonal nga buhatan sa DepEd Caraga aron ipasibaw ang kasagmuyo tungod sa pagpakabuta-bungol sa maong ahensya.

Ang mga raliyesta gipangunahan sa mga magtutudlo sa Alternative Learning Center for Agricultural and Livelihood Development (ALCADEV), mga estudyante, ug gipaluyohan sa Kahugpungan sa mga Lumad (KASALU), Kilusang Mayo Uno (KMU), Kabataan, ug Urban Poor – Lihok Butuan Kadamay.