2016 Power Supply sa Aneco, Subra-Subra

Ni Alex Mapoy

Seguradong hayag pa gihapon ang kagabhi-on sa Agusan del Norte sunod tuig tungod sa subra - subra nga suplay sa kuryente. Hulagway sa Cagampang Street lungsod sa Buenavista Agusan del Norte. Photo courtesy of Bernard Catch

BUTUAN CITY – Taliwala sa gikabalak-ang epekto sa El Niño Phenomenon, ang Agusan del Norte Electric Cooperative (Aneco), Inc. naneguro nga dili masinatian ang brownout sunod tuig hinungdan nga nakigkontrata na kining daan ngadto sa pito ka mga power supplier dinhe sa Mindanao.

Epektibo sunod tuig, magsugod na pagsuplay ang pito ka mga power supplier nga naglangkob sa Therma South Inc., Sarangani Energy Corp., FDC Misamis Power Corp., Asiga Green Energy, Enfinity Philippines, GN Power Ltd., ug Agusan Power Corp.

Basi sa datos nga gipagawas ni Aneco Technical Services Department Manager Engr. Darwin T. Daymiel, mokabat sa 97.46-MegaWatt ang power supply sa Aneco sunod tuig hinungdan nga seguradong walay brownout nga mahitabo sa mga konsumidor sa probensya, gawas na lamang kon dunay ipahigayong maintenance.

Ang power supply sa Aneco nga 97.46-MegaWatt, kuhaon ang 10-MegaWatt gikan sa Therma South Inc., 10-MegaWatt sa Sarangani Energy Corp., 12-MegaWatt sa FDC Misamis Power Corp., 8-MegaWatt sa Asiga Green Energy, 7.5-MegaWatt sa Enfinity Philippines, 24.96-MegaWatt sa GN Power Ltd., ug 25-MegaWatt sa Agusan Power Corp.

Gawas niana, plano sa kadumalahan sa Aneco nga mangutang og 5 ka dagkong Generator Set diin ang matag unit, kayang mo suplay og kuryente nga 2-MegaWatt hinungdan nga sa 5 ka GenSet, madugangan ang 97.46-MegaWatt og 10-MegaWatt.

Ang maong mga kuryente gikuha gikan sa coal, hydro, solar, ug diesel.

Halos sa mga gikontrata nga power supplier sa Aneco moabot sa tag – 25 ka tuig.